റായ്പൂരിൽ കസറി ഭുവനേശ്വർ കുമാർ : മുംബൈ ഇന്ത്യൻസിനെ 166 റൺസിലൊതുക്കി ആർസിബി
റായ്പൂരിലെ ഷഹീദ് വീർ നാരായൺ സിംഗ് ഇന്റർനാഷണൽ സ്റ്റേഡിയത്തിൽ നടക്കുന്ന ഐപിഎൽ 2026-ലെ 54-ാം മത്സരത്തിൽ മുംബൈ ഇന്ത്യൻസിനെ കുറഞ്ഞ സ്കോറിൽ തളച്ച് റോയൽ ചലഞ്ചേഴ്സ് ബെംഗളൂരു. ടോസ് നേടി പന്തെറിയാൻ തീരുമാനിച്ച ആർസിബി ക്യാപ്റ്റന്റെ തീരുമാനം ശരിവെക്കുന്ന പ്രകടനമാണ് ബൗളർമാർ പുറത്തെടുത്തത്. നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 166 റൺസെടുക്കാനേ മുംബൈ ഇന്ത്യൻസിന് സാധിച്ചുള്ളൂ. നാല് ഓവറിൽ വെറും 23 റൺസ് മാത്രം വഴങ്ങി നാല് വിക്കറ്റുകൾ വീഴ്ത്തിയ വെറ്ററൻ പേസർ ഭുവനേശ്വർ കുമാറിന്റെ തകർപ്പൻ പ്രകടനമാണ് മുംബൈയുടെ ബാറ്റിംഗ് നിരയെ തകർത്തത്.
തുടക്കം മുതൽ തന്നെ മുംബൈ ബാറ്റിംഗ് നിര പതറുന്ന കാഴ്ചയാണ് കണ്ടത്. ഓപ്പണർ റയാൻ റിക്കൽട്ടനെ (2) ആദ്യ ഓവറിൽ തന്നെ പുറത്താക്കി ഭുവനേശ്വർ കുമാർ വേട്ട തുടങ്ങി. രോഹിത് ശർമ്മ 10 പന്തിൽ 22 റൺസെടുത്ത് അതിവേഗം റൺസ് ഉയർത്താൻ ശ്രമിച്ചെങ്കിലും ഭുവനേശ്വറിന്റെ പന്തിൽ ജിതേഷ് ശർമ്മയ്ക്ക് ക്യാച്ച് നൽകി മടങ്ങി. പിന്നാലെ എത്തിയ സൂര്യകുമാർ യാദവിനെ ഗോൾഡൻ ഡക്കിന് പുറത്താക്കി ഭുവനേശ്വർ മുംബൈയെ 28-ന് 3 എന്ന ദയനീയ നിലയിലേക്ക് തള്ളിയിട്ടു. പവർപ്ലേ ഓവറുകളിൽ 53 റൺസ് നേടിയെങ്കിലും മുൻനിര ബാറ്റർമാരുടെ അപ്രതീക്ഷിത തകർച്ച മുംബൈയെ പ്രതിരോധത്തിലാക്കി.
തകർച്ചയിൽ നിന്ന് ടീമിനെ കരകയറ്റിയത് തിലക് വർമ്മയും നമൻ ധീറും ചേർന്നുള്ള 82 റൺസിന്റെ കൂട്ടുകെട്ടാണ്. നമൻ ധീർ 32 പന്തിൽ 47 റൺസെടുത്ത് പുറത്തായപ്പോൾ, ഒരു വശത്ത് നങ്കൂരമിട്ടു കളിച്ച തിലക് വർമ്മ 42 പന്തിൽ 57 റൺസുമായി മുംബൈയുടെ ടോപ്പ് സ്കോററായി. രസിഖ് സലാം ദാർ, റൊമാരിയോ ഷെപ്പേർഡ്, ജോഷ് ഹേസൽവുഡ് എന്നിവർ ഓരോ വിക്കറ്റ് വീതം വീഴ്ത്തി ഭുവനേശ്വറിന് മികച്ച പിന്തുണ നൽകി. അവസാന ഓവറുകളിൽ രാജ് ബാവയും (16) കോർബിൻ ബോഷും (5*) ചേർന്ന് സ്കോർ 160 കടത്തിയെങ്കിലും ആർസിബി ബൗളർമാരുടെ കൃത്യതയാർന്ന പന്തേറ് റൺറേറ്റ് നിയന്ത്രിച്ചു. 167 റൺസ് എന്ന വിജയലക്ഷ്യവുമായി മറുപടി ബാറ്റിംഗിനിറങ്ങുന്ന ബെംഗളൂരുവിന് ഈ സ്കോർ അനായാസം മറികടക്കാമെന്ന പ്രതീക്ഷയിലാണ് ആരാധകർ.