ഓസ്ട്രിയൻ ഗ്രാന്റ് പ്രീയോടെ ജൂലൈ 5 നു ഫോർമുല വൺ ആരംഭിക്കും

കൊറോണ വൈറസ് കാരണം നീണ്ടുപോയ 2020 ലെ ഫോർമുല വൺ സീസണിനു അടുത്ത മാസം അഞ്ചാം തിയതി തുടക്കമാവും. ഓസ്ട്രിയയിൽ നടക്കുന്ന റേസിലൂടെ എഫ് വൺ തുടങ്ങും എന്നാണ് അധികൃതർ നിലവിൽ അറിയിച്ചിരിക്കുന്നത്. നേരത്തെ നിരവധി ഗ്രാന്റ് പ്രീകൾ കൊറോണ മൂലം റദ്ദാക്കേണ്ടി വന്നിരുന്നു. നിലവിൽ ആദ്യത്തെ 8 റേസുകളുടെ മത്സരക്രമങ്ങൾ ആണ് അധികൃതർ പുറത്ത് വിട്ടത്. ജൂലൈ 5 നു ഓസ്ട്രിയയിൽ ആദ്യ റേസ് നടക്കുമ്പോൾ അവിടെ തന്നെ ജൂലൈ 12 നു രണ്ടാം റേസ് നടക്കും.

ജൂലൈ 19 നു ഹംഗറിയിൽ മൂന്നാം ഗ്രാന്റ് പ്രീ നടക്കുമ്പോൾ ഓഗസ്റ്റ് 2 നും 9 തിനും ആയി ബ്രിട്ടനിൽ നാലും അഞ്ചും ഗ്രാന്റ് പ്രീകൾ നടക്കും. ഓഗസ്റ്റ് 16 നു ബാഴ്‌സലോണയിൽ ആറാം ഗ്രാന്റ് പ്രീ നടക്കുമ്പോൾ ബെൽജിയം ഓഗസ്റ്റ് 30 തിനു ഏഴാം ഗ്രാന്റ് പ്രീക്ക് വേദി ആകും. സെപ്റ്റംബർ ആറിന് ഇറ്റലിയിൽ എട്ടാം ഗ്രാന്റ് പ്രീ നടക്കുന്ന വിധം ആണ് ഇത് വരെ റേസിംഗ് ക്രമം പ്രഖ്യാപിച്ചത്. നിലവിൽ ആദ്യ റേസുകളിൽ കൊറോണ മൂലം കാണികൾക്ക് പ്രവേശനം ഉണ്ടാവില്ല എന്നാൽ തുടർന്ന് കാണികളെ പ്രവേശിപ്പിക്കാൻ ആയാൽ അതിനു ശ്രമിക്കും എന്നും അധികൃതർ പറഞ്ഞു. ഏതാനും ആഴ്ചകൾക്ക് അകം വലിയ മത്സരാക്രമം അധികൃതർ പുറത്ത് വിടാൻ ആണ് സാധ്യത. നിലവിൽ ഡിസംബറിന് മുമ്പ് 15 മുതൽ 18 വരെ റേസുകൾ കൊണ്ട് സീസൺ അവസാനിപ്പിക്കാൻ ആവും അധികൃതർ ശ്രമിക്കുക.