ഇംഗ്ലീഷ് വനിത സൂപ്പർ ലീഗ് ചരിത്രത്തിലെ റെക്കോർഡ് കാണികൾ നോർത്ത് ലണ്ടൻ ഡാർബി കാണാൻ ഇന്ന് എത്തും. ഇതിനകം തന്നെ എമിറേറ്റ്സ് സ്റ്റേഡിയത്തിൽ നടക്കുന്ന മത്സരത്തിന്റെ 51,000 ടിക്കറ്റുകൾ വിറ്റത് ആയി ആഴ്സണൽ അറിയിച്ചിട്ടുണ്ട്. 2019 ലെ ടോട്ടൻഹാം സ്റ്റേഡിയത്തിൽ നടന്ന നോർത്ത് ലണ്ടൻ ഡാർബിയിൽ എത്തിയ 38,000 കാണികളുടെ റെക്കോർഡ് ഇന്ന് ഏതായാലും പഴയ കഥ ആവും എന്നുറപ്പാണ്. മുമ്പ് പലപ്പോഴും വനിത ഫുട്ബോളിന്റെ വളർച്ചക്ക് ആയി ടിക്കറ്റുകൾ വെറുതെ നൽകിയും വില കുറച്ച് നൽകിയും ആയിരുന്നു ക്ലബുകൾ കാണികളെ സ്റ്റേഡിയത്തിൽ എത്തിച്ചിരുന്നത്.
എന്നാൽ ഇത്തവണ ടിക്കറ്റുകൾ യഥാർത്ഥ വിലക്ക് തന്നെ വിൽക്കുക ആയിരുന്നു. ഇത് തന്നെ വനിത ഫുട്ബോളിന്റെ വലിയ സ്വീകാര്യതക്ക് സൂചന ആണെന്ന് ആഴ്സണൽ പരിശീലകൻ പ്രതികരിച്ചു. ആഴ്സണൽ വനിതകൾ മാഞ്ചസ്റ്റർ യുണൈറ്റഡ്, ചെൽസി സൂപ്പർ ലീഗ് മത്സരവും എമിറേറ്റ്സിൽ ആണ് കളിക്കുക എന്നതിനാൽ ഈ വർഷം തന്നെ ഈ റെക്കോർഡ് തകർന്നേക്കാനും സാധ്യതയുണ്ട്. യോഗ്യതയിൽ അയാക്സിനെ മറികടന്നാൽ ആഴ്സണൽ വനിതകൾ തങ്ങളുടെ ചാമ്പ്യൻസ് ലീഗ് മത്സരങ്ങളും എമിറേറ്റ്സ് സ്റ്റേഡിയത്തിൽ ആവും കളിക്കുക.