ഫ്രഞ്ച് യുവതാരം മനു കൊനെക്ക് വേണ്ടിയുള്ള ലിവർപൂൾ നീക്കങ്ങൾ പതിയെ മുന്നോട്ട്. താരത്തിന്റെ കൈമാറ്റ തുക ഏകദേശം നാൽപത് മില്യൺ യൂറോയോളം വരുമെന്ന് ഗ്ലാഡ്ബാക്ക് പ്രതീക്ഷിക്കുന്നതായി റോമാനോ റിപ്പോർട്ട് ചെയ്യുന്നു. ജർമൻ ടീമുമായി ലിവർപൂൾ ചർച്ചകൾ നടത്തി വരികയാണ്. ഈ ട്രാൻസ്ഫർ വിൻഡോയിൽ തന്നെ ഉദ്ദേശിച്ച തുക കിട്ടിയാൽ താരത്തെ കൈമാറാൻ മൊഞ്ചൻഗ്ലാഡ്ബാക്ക് സന്നദ്ധരാണ്. ലിവർപൂൾ തന്നെയാണ് നിലവിൽ കൊനെക്ക് വേണ്ടി സജീവമായി മുന്നിലുള്ള ടീം.
കൊനെക്ക് നിലവിൽ 2025 വരെയാണ് ഗ്ലാഡ്ബാക്കുമായി കരാർ ഉള്ളത്. അതേ സമയം മർക്കസ് തുറാം അടക്കമുള്ള താരങ്ങൾ കരാർ അവസാനിച്ച് ടീം വിടുന്ന സാഹചര്യത്തിൽ കൊനെയുടെ കൈമാറ്റം ടീമിന് വളരെ പ്രാധാന്യമുള്ളതാണ്. പകരക്കാരെ ടീമിന് ഉടൻ എത്തിക്കേണ്ടതായും ഉണ്ട്. താരത്തിന്റെ പ്രതിരോധത്തിൽ ഉള്ള മികവാണ് ക്ലോപ്പിന്റെ ശ്രദ്ധയിൽ താരത്തെ എത്തിക്കുന്നത്. ഫാബിഞ്ഞോയുടെ മോശം ഫോമും ആർതുറിന്റെ പരിക്കും മൂലം വലഞ്ഞ ലിവർപൂളിന് കൊനെയുടെ വരവ് മുതൽക്കൂടായിരിക്കും എന്ന കാര്യത്തിൽ സംശയമില്ല. അതേ സമയം ലിവർപൂളിന്റെ ഇപ്പോഴത്തെ ശ്രദ്ധ മാക് അലിസ്റ്ററിന്റെ കൈമാറ്റം പൂർത്തിയാക്കാൻ ആണെന്നും അതിന് ശേഷം മാത്രമേ കൊനെ അടക്കമുള്ള കൈമാറ്റങ്ങളിലേക്ക് ടീം കടക്കൂ എന്നും റോമാനോ സൂചിപ്പിക്കുന്നു.
Download the Fanport app now!
