ക്രിസ്റ്റൽ പാലസിന്റെ 26 കാരനായ ഫ്രഞ്ച് മുന്നേറ്റനിര താരം ഓഡ്സോനെ എഡാർഡിനെ ടീമിൽ എത്തിച്ചു ലെസ്റ്റർ സിറ്റി. ഈ സീസൺ അവസാനം വരെയുള്ള ലോണിൽ ആണ് താരത്തെ ലെസ്റ്റർ സിറ്റി ടീമിൽ എത്തിക്കുന്നത്. പാലസിൽ മറ്റെറ്റക്ക് പിറകിൽ ബെഞ്ചിൽ ആയിരുന്നു എഡാർഡിന്റെ സ്ഥാനം.
ഇതിനു പിന്നാലെ ആഴ്‌സണലിൽ നിന്നു എഡി എങ്കെതിയയെ പാലസ് സ്വന്തമാക്കിയതോടെ താരത്തെ വിടാൻ ക്ലബ് തീരുമാനിക്കുക ആയിരുന്നു. മുമ്പ് സെൽറ്റിക്കിൽ തകർത്തു കളിച്ച എഡാർഡ് 2021 ൽ വലിയ പ്രതീക്ഷകളോടെ ആണ് പാലസിൽ എത്തിയത്. എന്നാൽ ചില പ്രകടനങ്ങൾ ഒഴിച്ചാൽ വലിയ മികവ് ഒന്നും താരം പ്രീമിയർ ലീഗിൽ പുറത്ത് എടുത്തില്ല. താരത്തിൽ നിന്നു പ്രീമിയർ ലീഗിൽ നിലനിൽക്കാൻ ആവശ്യമായ ഗോളുകൾ ലഭിക്കും എന്നു തന്നെയാണ് ലെസ്റ്റർ പ്രതീക്ഷ.
