അവസാന സീസണുകളിൽ വോൾവ്സിന്റെ പ്രധാന താരമായിരുന്ന മൗട്ടീനോ സൗദി അറേബ്യയിലേക്ക് പോകാൻ സാധ്യത. സൗദിയിൽ നിന്ന് മൗട്ടീനോക്ക് വലിയ ഓഫറുകൾ വന്നതായി ഫബ്രിസിയോ റൊമാനോ റിപ്പോർട്ട് ചെയ്യുന്നു. ഈ മാസം കരാർ അവസാനിക്കുന്നതോടെ താരം ക്ലബ് വിടും എന്ന് വോൾവ്സ് നേരത്തെ അറിയിച്ചിരുന്നു. അഞ്ചു സീസൺ വോൾവ്സിൽ പൂർത്തിയാക്കി ആണ് മൗട്ടീനോ ക്ലബ് വിടുന്നത്.
2018ൽ ആയിരുന്നു മൗട്ടീനോ വോൾവ്സിൽ എത്തിയത്. അന്ന് മുതൽ വോൾവ്സ് ടീമിന്റെ മധ്യനിരയിലെ വിശ്വസ്ഥനായി മൗട്ടീനോ തുടർന്നു. ഇതുവരെ വോൾവ്സിനായി 200ൽ അധികം മത്സരങ്ങൾ താരം കളിച്ചു. 36കരാനായ താരം പോർച്ചുഗലിലേക്ക് മടങ്ങി പോകും എന്ന് അഭ്യൂഹങ്ങൾ ഉണ്ടായിരുന്നു. മുമ്പ് പോർട്ടോ, മൊണാക്കോ, സ്പോർടിങ് എന്നീ ക്ലബുകൾക്കായി കളിച്ചിട്ടുള്ള താരമാണ് മൗട്ടീനോ. പോർച്ചുഗലിനായി 150ന് അടുത്ത് മത്സരങ്ങളും മൗട്ടീനോ കളിച്ചിട്ടുണ്ട്. മൗട്ടീനോ ഭാവി എന്താണെന്ന് അടുത്ത ദിവസങ്ങളിൽ തന്നെ തീരുമാനിക്കും.
