ഇർഷാദ് ഇനി മൊഹമ്മദൻസിൽ. താരം ഐ ലീഗ് ക്ലബിൽ രണ്ടു വർഷത്തെ കരാർ ഒപ്പുവെച്ചതായാണ് റിപ്പോർട്ട്. ഇർഷാദ് നോർത്ത് ഈസ്റ്റ് വിട്ടതായി ക്ലബ് കഴിഞ്ഞ ദിവസം അറിയിച്ചിരുന്നു. അവസാന രണ്ടു വർഷമായി ഇർഷാദ് നോർത്ത് ഈസ്റ്റിനൊപ്പം ഐ എസ് എല്ലിൽ ഉണ്ടായിരുന്നു. മുൻ ഗോകുലം കേരള ക്യാപ്റ്റൻ ആണ് മുഹമ്മദ് ഇർഷാദ്.
നോർത്ത് ഈസ്റ്റിൽ എത്തും മുമ്പ് പഞ്ചാബ് എഫ് സിയിലും ഈസ്റ്റ് ബംഗാളിലുമായാണ് ഇർഷാദ് കളിച്ചിരുന്നത്. അതിനു മുമ്പ് മൂന്ന് സീസണുകളോളം ഗോകുലത്തിനൊപ്പം ഇർഷാദ് ഉണ്ടായിരുന്നു. വേഴ്സറ്റൈൽ താരമായ ഇർഷാദ് മൊഹമ്മദൻസ് ടീമിനു കരുത്ത് നൽകും. മിഡ്ഫീൽഡർ ആണെങ്കിലും റൈറ്റ് ബാക്കിന്റെ റോളിലും ഇർഷാദ് മികവ് തെളിയിച്ചിട്ടുണ്ട്.
ഗോകുലം ഡ്യൂറണ്ട് കപ്പ് കിരീടം നേടിയപ്പോൾ ഇർഷാദ് ടീമിൽ ഉണ്ടായിരുന്നു. തിരൂർ സാറ്റ് അക്കാഡമിയിലൂടെ വളർന്നു വന്ന ഇർഷാദ് സാറ്റിനായി കേരള പ്രീമിയർ ലീഗിൽ അടക്കം നിരവധി ടൂർണമെന്റുകളിൽ മുമ്പ് കളിച്ചിട്ടുണ്ട്. സർവീസസിന് വേണ്ടിയും മഹാരാഷ്ട്രയ്ക്ക് വേണ്ടും സന്തോഷ് ട്രോഫിയും കളിച്ചിട്ടുണ്ട്. ഡി.എസ്.കെ ശിവാജിയൻസ്, ഫത്തേഹ് ഹൈദരാബാദ് തുടങ്ങിയ ക്ലബുകൾക്ക് വേണ്ടി ബൂട്ടണിഞ്ഞിട്ടുണ്ട്. 2015 നാഷണൽ ഗെയിംസിൽ മഹാരാഷ്ടയ്ക്ക് വേണ്ടി കളിച്ച് ടോപ്സ്കോറർ പട്ടം സ്വന്തമാക്കിയ താരമാണ് ഈ തിരൂരുകാരൻ.
