റോമ ഫോർവേഡ് പൗലോ ഡിബാല ക്ലബിൽ തുടരും. സൗദി ക്ലബായ അൽ ഖദ്സിയയുടെ ഓഫർ ഡിബാല പരിഗണിച്ചു എങ്കിലും അവസാനം റോമയിൽ തന്നെ തുടരാം എന്ന് തീരുമാനിക്കുക ആയിരുന്നു. യൂറോപ്പിൽ തുടരുന്നത് ആണ് തനിക്ക് നല്ലതെന്ന് ഡിബാല വിലയിരുത്തുന്നു. കഴിഞ്ഞ സീസണിലും റോമ വിടാൻ ഡിബാല ശ്രമിച്ചിരുന്നു എങ്കിലും അവസാനം അവിടെ തന്നെ തുടരുകയായിരുന്നു.
യുവന്റസ് വിട്ട് രണ്ട് സീസൺ മുമ്പ് ആയിരുന്നു ഡിബാല റോമയിൽ എത്തിയത്. റോമിൽ അദ്ദേഹം തന്റെ ഫോം തിരികെ കണ്ടെത്തി. അതിനു മുമ്പ് 2015 മുതൽ നീണ്ട ഏഴ് വർഷം യുവന്റസിനൊപ്പമായിരുന്നു ഡിബാല. അവിടെയുള്ള സമയത്ത് ക്ലബ്ബിന്റെ പ്രധാന കളിക്കാരിൽ ഒരാളായിരുന്നു. 29 കാരനായ താരം യുവന്റസ് ക്ലബ്ബിനൊപ്പം അഞ്ച് സീരി എ കിരീടങ്ങളും നാല് കോപ്പ ഇറ്റാലിയ ട്രോഫികളും നേടിയിട്ടുണ്ട്. റോമക്ക് ഒപ്പം കോൺഫറൻസ് ലീഗ് കിരീടവും നേടി.
