ലെഫ്റ്റ് ബാക്കിൽ കളിക്കാൻ താരങ്ങൾ ഇല്ലാതെ പ്രതിസന്ധിയിൽ നിൽക്കുന്ന മാഞ്ചസ്റ്റർ യുണൈറ്റഡ് ചെൽസി താരം കുകുറേയയെ സൈൻ ചെയ്യാൻ ശ്രമിക്കുന്നതായി റിപ്പോർട്ടുകൾ. ഒരു വർഷത്തെ ലോൺ കരാറിൽ ആണ് മാഞ്ചസ്റ്റർ യുണൈറ്റഡ് കുകുറേയയെ ടീമിൽ എത്തിക്കാൻ നോക്കുന്നത്. ചെൽസിയുമായി യുണൈറ്റഡ് ഇതിനകം ഇതു സംബന്ധിച്ച ചർച്ചകൾ ആരംഭിച്ചിട്ടുണ്ട്.
ലൂക് ഷോക്ക് പരിക്കേറ്റതോടെയാണ് മാഞ്ചസ്റ്റർ യുണൈറ്റഡ് പുതിയ ലെഫ്റ്റ് ബാക്കിനെ തേടി ഇറങ്ങിയത്. യുണൈറ്റഡിന്റെ മറ്റൊരു ലെഫ്റ്റ് ബാക്കായ മലാസിയയും പരിക്കിന്റെ പിടിയിലാണ്. ഇന്നലെ ഡാലോട്ട് ആയിരുന്നു യുണൈറ്റഡിനായി ലെഫ്റ്റ് ബാക്കായി ഇറങ്ങിയത്.
ചെൽസിയുടെ കുകുറേയ അവിടെ ടീമിൽ ഇപ്പോൾ സ്ഥിരംഗമല്ല. കഴിഞ്ഞ സീസണിൽ വലിയ പ്രതീക്ഷയോടെ ആയിരുന്നു ചെൽസി ബ്രൈറ്റണിൽ നിന്ന് കുകുറേയയെ ടീമിൽ എത്തിച്ചത്. എന്നാൽ ചെൽസിയിൽ കുകുറേയക്ക് ഇതുവരെ കാര്യങ്ങൾ ഒന്നും അത്ര നല്ല രീതിയിൽ അല്ല നടന്നത്. താരവും ഒരു മാറ്റം ആഗ്രഹിക്കുന്നുണ്ട്.
50 മില്യണിൽ അധികം ആണ് ചെൽസി കുകുറേയയെ സ്വന്തമാക്കാൻ വേണ്ടി ബ്രൈറ്റണ് നൽകിയത്. ബാഴ്സലോണയുടെയും എസ്പാന്യോളിന്റെയും അക്കാദമികളിലൂടെ ആണ് കുകുറേയ വളർന്നത്. ബാഴ്സലോണ ബി ടീമിനായി 3 വർഷത്തോളം കളിച്ചിരുന്നു. ബാഴ്സലോണ സീനിയർ ടീമിൽ അവസരം ലഭിക്കാതെ വന്നതോടെ താരം ഗെറ്റഫയിലേക്ക് പോയി. അവിടെ നിന്നായിരുന്നു താരം ബ്രൈറ്റണിലേക്ക് വന്നത്.
