മുൻ ആഴ്സണൽ താരം ഐൻസ്‌ലി മൈറ്റ്‌ലാൻഡ്-നൈൽസ് (25) ഒളിമ്പിക് ലിയോണിൽ ചേർന്നു. അവിടെ താരം നാല് വർഷത്തെ കരാറിൽ ഒപ്പുവെക്കുകയും ചെയ്തു. ആഴ്സണലുമായുള്ള താരത്തിന്റെ കരാർ അവസാനിച്ചതിനാൽ ഇംഗ്ലണ്ട് ഇന്റർനാഷണൽ ഫ്രീ ഏജന്റായിരുന്നു. മൈറ്റ്‌ലാൻഡ്-നൈൽസ് കഴിഞ്ഞ സീസണിൽ സതാംപ്ടണിൽ ലോണിൽ കളിച്ചിരുന്നു. അവിടെ അദ്ദേഹം 22 പ്രീമിയർ ലീഗ് ഗെയിമുകളിൽ മാത്രമാണ് കളിച്ചത്.
ഒളിമ്പിക് ലിയോണൈസിനായി സൈൻ ചെയ്യുന്ന ആദ്യ ഇംഗ്ലീഷ് കളിക്കാരനാണ് മൈറ്റ്‌ലാൻഡ്-നൈൽസ്. മൈറ്റ്‌ലാൻഡ്-നൈൽസ് ഒരു റൈറ്റ് ബാക്ക് അല്ലെങ്കിൽ റൈറ്റ്-സൈഡ് മിഡ്‌ഫീൽഡറായി കളിക്കാൻ കഴിവുള്ള താരമാണ്. ലിയോൺ താരത്തെ മിഡ്ഫീൽഡിൽ കളിപ്പിക്കും എന്നാണ് പ്രതീക്ഷിക്കപ്പെടുന്നത്. ഈ സമ്മറിൽ ലിയോൺ നടത്തുന്ന നാലാമത്തെ സൈനിംഗ് ആണ് ഇംഗ്ലീഷ് താരം.
“ലിയോണിൽ കരാർ ഒപ്പിടുന്നതിൽ എനിക്ക് അതിയായ സന്തോഷമുണ്ട്”, മൈറ്റ്‌ലാൻഡ്-നൈൽസ് പറഞ്ഞു. “ഞാൻ ഒരു ദിവസം ഒളിമ്പിക് ലിയോണൈസിൽ എത്തുമെന്ന് എന്നോട് ആരെങ്കിലും പറഞ്ഞിരുന്നെങ്കിൽ, എനിക്കത് ഒരിക്കലും സങ്കൽപ്പിക്കാൻ കഴിയുമായിരുന്നുല്ല” എന്നും താരം പറഞ്ഞു.
