ഇറ്റാലിയൻ സീരി എയിൽ ആദ്യ മത്സരത്തിൽ ജയവുമായി എ.സി മിലാൻ. ബൊലോഗ്നക്ക് എതിരെ അവരുടെ മൈതാനത്ത് എതിരില്ലാത്ത രണ്ടു ഗോളുകൾക്ക് ആണ് മിലാൻ ജയം കണ്ടത്. തന്റെ അരങ്ങേറ്റ മത്സരത്തിൽ അതുഗ്രൻ ലോങ് റേഞ്ച് ഗോളുമായി അമേരിക്കൻ താരം ക്രിസ്റ്റിയൻ പുലിസിക് വരവ് അറിയിച്ചു. മത്സരത്തിൽ കൂടുതൽ നേരം പന്ത് കൈവശം വെച്ചതും അവസരങ്ങൾ സൃഷ്ടിച്ചതും ബൊലോഗ്ന ആയിരുന്നു.
മത്സരത്തിൽ 11 മത്തെ മിനിറ്റിൽ മിലാൻ മുന്നിലെത്തി. പുലിസികിന്റെ ക്രോസിൽ നിന്നു റെഹിന്റെഴ്സ് നൽകിയ പാസിൽ നിന്നു ഒളിവർ ജിറൂദ് ആണ് മിലാന്റെ ആദ്യ ഗോൾ നേടിയത്. തുടർന്ന് 21 മത്തെ മിനിറ്റിൽ ജിറൂദിന്റെ പാസിൽ നിന്നു അതുഗ്രൻ ഗോളിലൂടെ പുലിസിക് ജയം പൂർത്തിയാക്കി. രണ്ടാം പകുതിയിൽ ബൊലോഗ്നയുടെ ശ്രമങ്ങൾ മിലാൻ പ്രതിരോധിച്ചു. ബൊലോഗ്നയുടെ മൈതാനത്ത് കഴിഞ്ഞ 18 കളികളിൽ മിലാൻ പരാജയം അറിഞ്ഞിട്ടില്ല.
