പുതിയ ഇറ്റാലിയൻ സീരി എ സീസണിന് മികച്ച രീതിയിൽ തുടങ്ങി യുവന്റസ്. പുതിയ പരിശീലകൻ തിയാഗോ മോട്ടോക്ക് കീഴിൽ പുതുതായി ലീഗിൽ എത്തിയ കോമോയെ എതിരില്ലാത്ത 3 ഗോളുകൾക്ക് ആണ് യുവന്റസ് തോൽപ്പിച്ചത്. സെസ്ക് ഫാബ്രിഗാസിന് കീഴിൽ ഇറങ്ങിയ കോമോക്ക് എതിരെ സമ്പൂർണ ആധിപത്യം ആണ് യുവന്റസ് മത്സരത്തിൽ പുലർത്തിയത്. പലപ്പോഴും 41 കാരനായ ഗോൾ കീപ്പർ പെപെ റെയ്നയാണ് ഫാബ്രിഗാസിന്റെ ടീമിന്റെ രക്ഷക്ക് എത്തിയത്.
മത്സരത്തിൽ 23 മത്തെ മിനിറ്റിൽ മികച്ച വ്യക്തിഗത മികവ് കൊണ്ട് സാമുവൽ ബാങ്കുലയാണ് യുവന്റസിന് മുൻതൂക്കം നൽകിയത്. തുടർന്ന് വ്ലാഹോവിചിന്റെ ഷോട്ട് പോസ്റ്റിൽ തട്ടി മടങ്ങുന്നതും കാണാൻ ആയി. തുടർന്ന് ആദ്യ പകുതി അവസാനിക്കുന്നതിനു തൊട്ടു മുമ്പ് കെനാൻ യിൽദിസിന്റെ പാസിൽ നിന്നു ഗോൾ നേടിയ ടിം വെയ യുവന്റസിന് രണ്ടാം ഗോളും സമ്മാനിച്ചു. രണ്ടാം പകുതിയിൽ വ്ലാഹോവിചിന്റെ ഗോൾ ഓഫ് സൈഡ് വിളിക്കുന്നതും കണ്ടു. മത്സരത്തിൽ രണ്ടാം പകുതിയിൽ ഇഞ്ച്വറി സമയത്ത് 91 മത്തെ മിനിറ്റിൽ സാമുവൽ ബാങ്കുലയുടെ പാസിൽ നിന്നു ആന്ദ്രയെ കാമ്പിയാസോ കൂടി ഗോൾ നേടിയതോടെ യുവന്റസ് ജയം പൂർത്തിയാക്കുക ആയിരുന്നു.
