മുൻ അത്ലറ്റിക്കോ മാഡ്രിഡ് ക്യാപ്റ്റനും ഇതിഹാസവുമായ സെന്റർ ബാക്ക് ഡിയേഗോ ഗോഡിന്റെ ഇറ്റലിയിലെ അരങ്ങേറ്റം വൈകും. ഇറ്റാലിയൻ ക്ലബായ ഇന്റർ മിലാനിൽ എത്തിയ താരം പരിക്കിന്റെ പിടിയിലായതാണ് പ്രശ്നമായിരിക്കുന്നത്. ഗോഡിന് ലീഗിലെ ആദ്യ മത്സരം നഷ്ടമാകും എന്നാണ് ക്ലബുമായി അടുത്ത വൃത്തങ്ങൾ വ്യക്തമാക്കുന്നത്. താരം ഇപ്പോൾ പ്രീസീസൺ അവസാനിപ്പിച്ച് ഇറ്റലിയിലേക്ക് തിരിച്ചിരിക്കുകയാണ്.
ഇറ്റലിയിൽ ഏറ്റവും കൂടുതൽ ശംബളം വാങ്ങുന്ന താരങ്ങളിൽ ഒരാളായാണ് ഗോഡിൻ ഇന്ററിൽ എത്തിയത്. 33കാരനായ ഗോഡിൻ 2010 മുതൽ അത്ലറ്റിക്കോ മാഡ്രിഡിൽ ആയിരുന്നു കളിച്ചത്. 300ൽ അധികം മത്സരങ്ങൾ അത്ലറ്റിക്കോ ജേഴ്സിയിൽ കളിച്ച താരമാണ് ഗോഡിൻ. അത്ലറ്റിക്കോ മാഡ്രിഡിനൊപ്പം ഒരു ലാലിഗ കിരീടം, രണ്ട് യൂറോപ്പ ലീഗ് കിരീടം ഒരു കോപ ഡെൽ റേ എന്നിവയും ഗോഡിൻ നേടിയിട്ടുണ്ട്. ഒപ്പം രണ്ട് തവണ ചാമ്പ്യൻസ് ലീഗ് ഫൈനലിൽ അത്ലറ്റിക്കോ മാഡ്രിഡ് എത്തിയപ്പോഴും ഗോഡിൻ ടീമിലെ പ്രധാന താരമായി ഉണ്ടായിരുന്നു. ഇന്റർ മിലാനെ ലീഗ് കിരീടത്തിലേക്ക് തിരികെ എത്തിക്കുക എന്ന ലക്ഷ്യത്തോടെ ആണ് ഗോഡിനെ ക്ലബ് ഇറ്റലിയിൽ എത്തിച്ചിരിക്കുന്നത്.
