ഗോള്‍ഡന്‍ ത്രെഡ്‌സ്-കെഎസ്ഇബി മത്സരം വൈകിട്ട് 3.30ന്
കോഴിക്കോട്: ലീഗിലെ കന്നി കിരീടം ലക്ഷ്യമിട്ട് ഗോള്‍ഡന്‍ ത്രെഡ്‌സും, കഴിഞ്ഞ തവണ നഷ്ടമായ കിരീടം തിരിച്ചുപിടിക്കാന്‍ കെഎസ്ഇബിയും ഇറങ്ങുമ്പോള്‍ രാംകോ കേരള പ്രീമിയര്‍ ലീഗില്‍ ഫൈനല്‍ പോരാട്ടം തീപാറും. മത്സരം ഇന്ന് (ഞായര്‍) വൈകിട്ട് 3.30ന് കോഴിക്കോട് കോര്‍പറേഷന്‍ സ്‌റ്റേഡിയത്തില്‍. ലീഗില്‍ ഏറ്റവും കുറഞ്ഞ ഗോള്‍ വഴങ്ങിയെന്ന റെക്കോഡുമായെത്തിയ സാറ്റ് തിരൂരിനെ എതിരില്ലാത്ത ഒരു ഗോളിന് തോല്‍പ്പിച്ചാണ് ഗോള്‍ഡന്‍ ത്രെഡ്‌സ് ലീഗ് ചരിത്രത്തിലാദ്യമായി ഫൈനലില്‍ പ്രവേശിച്ചത്. കെഎസ്ഇബി, ലീഗില്‍ അപരാജിതരായി കുതിച്ച ബാസ്‌കോ ഒതുക്കുങ്ങലിനെ 2-1ന് മറികടന്നാണ് തുടര്‍ച്ചയായ രണ്ടാം ഫൈനലിന് ഇറങ്ങുന്നത്. 
ഗ്രൂപ്പ് ഘട്ടത്തില്‍ ഇരുടീമുകളും നേര്‍ക്കുനേര്‍ വന്നപ്പോള്‍ കെഎസ്ഇബിക്കായിരുന്നു ജയം. മാര്‍ച്ച് 13ന് നടന്ന മത്സരത്തില്‍ ഏകപക്ഷീയമായ രണ്ടു ഗോളിനായിരുന്നു ത്രെഡ്‌സിന്റെ തോല്‍വി. കലാശക്കളിക്ക് ഇഇറങ്ങുമ്പോള്‍ ആ തോല്‍വിക്ക് പകരം ചോദിക്കുകയെന്ന ലക്ഷ്യവും ത്രെഡ്‌സിനുണ്ട്. മധ്യനിരയില്‍ കളിമെനയുന്ന ഒത്തറേസിയാണ് ത്രെഡ്‌സിന്റെ കുന്തമുന. 11 ഗോളുമായി ഗോള്‍ഡന്‍ ബൂട്ടിനായി മുന്നിലുള്ള ഘാന സ്‌ട്രൈക്കര്‍ ഇസ്ഹാഖ് നുഹു സെയ്ദുവും ടീമിന്റെ കരുത്താണ്. സാറ്റിനെതിരെ മികച്ച പ്രകടനം നടത്തിയ ഗോളി മനോബിനും മികച്ച ഫോമിലായാല്‍ വിജയം എളുപ്പമാവുമെന്ന് ടീം കണക്കുകൂട്ടുന്നു. കെപിഎല്‍ വരുന്നതിന് മുമ്പ് 2012ല്‍ സംസ്ഥാന ക്ലബ്ബ് ചാമ്പ്യന്‍മാരായിരുന്നു ത്രെഡ്‌സ്. 2018-19 സീസണിലാണ് ടീം കെപിഎല്‍ വഴി തിരിച്ചുവരവ് നടത്തിയത്. 
2017ലെ കെപിഎല്‍ ചാമ്പ്യന്‍മാരായ കെഎസ്ഇബി സീസണിലുടനീളം ഫുള്‍ ചാര്‍ജിലായിരുന്നു. ഇന്ന് കിരീടം ചൂടാനായാല്‍ കഴിഞ്ഞ ഫൈനലില്‍ ഗോകുലത്തിനെതിരായ തോല്‍വി കൂടി ബോര്‍ഡ് ടീമിന് മറക്കാം. നിലവിലെ ചാമ്പ്യന്‍മാരായ ഗോകുലത്തെ ഉള്‍പ്പെടെ തോല്‍പ്പിച്ച് അപരാജിതരായി മുന്നേറിയ ബാസ്‌കോയെ സെമിയില്‍ വീഴ്ത്തിയത് ടീമിന് വലിയ ആത്മവിശ്വാസം നല്‍കിയിട്ടുണ്ട്. ഗോള്‍ഡന്‍ ബൂട്ട് പോരാട്ടത്തില്‍ ത്രെഡ്‌സിന്റെ നുഹുവിനൊപ്പമുള്ള എം.വിഘ്‌നേഷ്, ഇതുവരെ ആറ് ഗോളുകള്‍ കണ്ടെത്തിയ നിജോ ഗില്‍ബെര്‍ട്ട് എന്നിവരാണ് ടീമിന്റെ ആക്രമണം നയിക്കുന്നത്. ഇന്ന് ജയിച്ചാല്‍ എസ്ബിഐയുടെയും ഗോകുലത്തിന്റെയും രണ്ട് കെപിഎല്‍ കിരീടമെന്ന നേട്ടത്തിനൊപ്പമെത്താനും കെഎസ്ഇബിക്ക് കഴിയും.
ഫൈനല്‍ മത്സരം സ്‌പോര്‍ട്‌സ്‌കാസ്റ്റ് ഇന്ത്യയുടെ യുട്യൂബ് ചാനലില്‍ തത്സമയം സംപ്രേക്ഷണം ചെയ്യും.
https://www.youtube.com/c/SportsCastIndia
