മാഞ്ചസ്റ്റർ യുണൈറ്റഡിന്റെ സ്റ്റാർ ഫോർവേഡ് മാർക്കസ് റാഷ്ഫോർഡ് ഇന്നലെ നേടിയ ഇരട്ട ഗോളുകളോടെ തന്റെ തന്നെ സ്കോറിംഗ് റെക്കോർഡ് തകർത്തിരിക്കുകയാണ്. ഇന്നലെ ലെസ്റ്ററിന് എതിരെ കൂടെ ഗോൾ നേടിയതോടെ മാഞ്ചസ്റ്റർ യുണൈറ്റഡ് താരം ഗോളടിയിൽ തന്റെ കരിയറിലെ ഏറ്റവും മികച്ച സീസണാക്കി ഈ സീസണെ മാറ്റി. എല്ലാ മത്സരങ്ങളിലുമായി 24 ഗോളുകളും 8 അസിസ്റ്റുകളും ഈ സീസണിൽ റാഷ്ഫോർഡ് മാഞ്ചസ്റ്റർ യുണൈറ്റഡിനായി നേടി.
2019-20 സീസൺ ആയിരുന്നു ഇതിനു മുമ്പത്തെ റാഷ്ഫോർഡിന്റെ ഏറ്റവും മികച്ച സീസൺ. 22 ഗോളുകൾ ആയിരുന്നു അന്ന് ഒലെ ഗണ്ണാർ സോൾഷ്യറിന്റെ കീഴിൽ റാഷ്ഫോർഡ് അടിച്ചത്. ഈ സീസൺ പകുതി കഴിയുമ്പോൾ തന്നെ റാഷ്ഫോർഡ് ആ റെക്കോർഡ് മറികടന്നിരിക്കുകയാണ്. കഴിഞ്ഞ സീസണിൽ ആകെ 5 ഗോളുകൾ മാത്രം നേടിയ താരമാണ് റാഷ്ഫോർഡ്. റാഷ്ഫോർഡിന്റെ 24 ഗോളുകളിൽ 16 ഗോളുകൾ വന്നത് ലോകകപ്പിനു ശേഷമായിരുന്നു.
