മാഞ്ചസ്റ്റർ യുണൈറ്റഡിന് ക്രിസ്തുമസിനും സന്തോഷിക്കാൻ ഒന്നുമില്ല. ഇന്ന് പ്രീമിയർ ലീഗിൽ വെസ്റ്റ് ഹാമിനെ നേരിട്ട മാഞ്ചസ്റ്റർ യുണൈറ്റഡ് ലണ്ടണിൽ എതിരില്ലാത്ത രണ്ടു ഗോളുകളുടെ പരാജയം നേരിട്ടു. പ്രീമിയർ ലീഗിൽ മാഞ്ചസ്റ്റർ യുണൈറ്റഡിന്റെ ഈ സീസണിലെ 8ആം പരാജയമാണിത്. മാഞ്ചസ്റ്റർ യുണൈറ്റഡ് ഇന്നും ഗോൾ കണ്ടെത്തിയില്ല. അവസാന നാലു മത്സരങ്ങളിൽ മാഞ്ചസ്റ്റർ യുണൈറ്റഡ് ഒരു ഗോൾ പോലും സ്കോർ ചെയ്തിട്ടില്ല.
ഇന്ന് വിരസമായ ആദ്യ പകുതി ആണ് വെസ്റ്റ് ഹാമിന്റെ ഹോം ഗ്രൗണ്ടിൽ കാണാൻ ആയത്. ഇരു ടീമുകളും കാര്യമായ അവസരങ്ങൾ സൃഷ്ടിച്ചില്ല. രണ്ടാം പകുതിയിൽ ഹൊയ്ലുണ്ടിനെ മാറ്റി റാഷ്ഫോർഡിനെ യുണൈറ്റഡ് സബ്ബായി കളത്തിൽ എത്തിച്ചു എങ്കിലും യുണൈറ്റഡ് അറ്റാക്കിൽ കാര്യമായ പുരോഗമനം ഉണ്ടായില്ല.
മത്സരത്തിന്റെ 72ആം മിനുട്ടിൽ പക്വേറ്റയുടെ ഒരു മനോഹരമായ പാസിൽ നിന്ന് ജെറദ് ബോവനാണ് വെസ്റ്റ് ഹാമിന് ലീഡ് നൽകിയത്. അതു കഴിഞ്ഞ് അധികം വൈകാതെ മുഹമ്മദ് കുദുസിലൂടെ വെസ്റ്റ് ഹാം തങ്ങളുടെ രണ്ടാം ഗോളും നേടി വിജയം ഉറപ്പിച്ചു. മാഞ്ചസ്റ്റർ യുണൈറ്റഡിൽ നിന്ന് ഒരു പ്രത്യാക്രമണമോ സമ്മർദ്ദമോ ഒന്നും വെസ്റ്റ് ഹാം നേരിടേണ്ടി വന്നില്ല.
ഈ വിജയത്തോടെ വെസ്റ്റ് ഹാം യുണൈറ്റഡ് മാഞ്ചസ്റ്റർ യുണൈറ്റഡിനെ മറികടന്ന് ലീഗിൽ ആറാം സ്ഥാനത്തേക്ക് എത്തി. 28 പോയിന്റുള്ള മാഞ്ചസ്റ്റർ യുണൈറ്റഡ് എട്ടാം സ്ഥാനത്താണ് നിൽക്കുന്നത്.
