സ്പർസിലേക്ക് മടങ്ങി വരാതെ നിന്ന സ്‌ട്രൈക്കർ ഹാരി കെയ്ൻ സംഭവത്തിന് ശേഷം ഔദ്യോഗികമായി പ്രതികരിച്ചു. തന്റെ ട്വിറ്റർ അകൗണ്ട് വഴിയാണ് താരം നാളെ സ്പർസ് പരിശീലനത്തിൽ മടങ്ങി എത്തും എന്ന് അറിയിച്ചത്. ആരാധകരുമായുള്ള തന്റെ ബന്ധം നശിപ്പിക്കുന്ന ഒരു നടപടിയും തന്റെ ഭാഗത്ത് നിന്ന് ഉണ്ടാവില്ല എന്നും ഇംഗ്ലണ്ട് ക്യാപ്റ്റൻ കൂടിയായ കെയ്ൻ കൂട്ടി ചേർത്തു.
തന്റെ പ്രൊഫഷണലിസത്തെ ചിലർ ചോദ്യം ചെയ്തത് അങ്ങേയറ്റം വേദന ഉണ്ടാക്കി. ഇപ്പോഴത്തെ സാഹചര്യങ്ങളെ കുറിച്ചു കൂടുതൽ വെളിപ്പെടുത്താൻ ഇല്ലെങ്കിലും താൻ ഒരിക്കലും പരിശീലിക്കാൻ തയ്യാറാവാതെ നിന്നിട്ടില്ല. തനിക്ക് എന്നും നിരുപാധിക പിന്തുണ തന്ന ആരാധകരുമായുള്ള ബന്ധം ഇല്ലാതാകുന്ന ഒരു നടപടിയും താൻ ചെയ്യില്ല എന്നും കെയ്ൻ വ്യക്തമാക്കി.
കെയ്ൻ സ്പർസ് വിടാനുള്ള ആഗ്രഹം യൂറോ കപ്പിന് മുൻപ് തന്നെ വ്യക്തമാക്കിയിരുന്നു. പക്ഷെ താരത്തെ വിൽക്കാൻ സ്പർസ് തയ്യാറാവാതെ വന്നതോടെയാണ് താരവും ക്ലബ്ബും ഉടക്കിയത്. മാഞ്ചസ്റ്റർ സിറ്റി താരത്തെ സ്വന്തമാക്കാൻ ആഗ്രഹിക്കുന്നുണ്ട്.
