റൂബൻ അമോറിം മാനേജർ ആയി ചുമതലയേറ്റ ശേഷമുള്ള മാഞ്ചസ്റ്റർ യുണൈറ്റഡിന്റെ ആദ്യ മത്സരം ഇന്ന് നടക്കും. സ്പോർട്ടിംഗ് ലിസ്ബണിൽ അത്ഭുതം കാണിച്ചിട്ടുള്ള യുവ പരിശീലകൻ ഇന്ന് യുണൈറ്റഡിലെ ആദ്യ മത്സരത്തിൽ ഇപ്സ്വിച്ച് ടൗണിനെ ആണ് നേരിടുക.
പോർട്ട്മാൻ റോഡിൽ വെച്ചാകും മത്സരം നടക്കുക. അമോറിമിനു കീഴിലെ പരിശീലന സെഷനുകൾ മാഞ്ചസ്റ്റർ യുണൈറ്റഡിൽ പോസിറ്റീവ് അന്തരീക്ഷം ഉണ്ടാക്കിയിട്ടുണ്ട്. അമോറിമിന്റെ ഫോർമേഷാനും ഏതൊക്കെ താരങ്ങളെ ആകും അദ്ദേഹം ആദ്യ ഇലവനിലേക്ക് പരിഗണിക്കുക എന്നതും ആകും ആദ്യ മത്സരത്തിൽ ഏവരും ഉറ്റു നോക്കുന്നത്.
മുൻ യുണൈറ്റഡ് അസിസ്റ്റൻ്റ് പരിശീലകൻ കീറൻ മക്കെന്നയുടെ കീഴിലുള്ള ഇപ്സ്വിച്ച് ടൗൺ, അന്താരാഷ്ട്ര ഇടവേളയ്ക്ക് മുമ്പ് ടോട്ടൻഹാമിനെതിരെ 2-1 ന് വിജയിച്ച് ഫോമിലായിരുന്നു. നിലവിൽ ടേബിളിൽ 17-ാം സ്ഥാനത്തുള്ള ട്രാക്ടർ ബോയ്സ് ഈ സീസണിൽ ആറ് ഗോളുകളുമായി മികച്ച ഫോമിലുള്ള ലിയാം ഡെലാപ്പിനെയാണ് പ്രധാനമായി ആശ്രയിക്കുക.
ഇന്ന് രാത്രി 10 മണിക്ക് നടക്കുന്ന മത്സരം സ്റ്റാർ സ്പോർട്സിലും ഹോട്സ്റ്റാറിലും കാണാൻ ആകും.
