പ്രീമിയർ ലീഗിൽ ടോപ് ഫോർ ലക്ഷ്യമാക്കി ഇറങ്ങിയ എവർട്ടണും ടോട്ടൻഹാമിനും സമനില. ഗൂഡിസൺ പാർക്കിൽ നടന്ന മത്സരത്തിൽ 2-2നാണ് മത്സരം സമനിലയിൽ അവസാനിച്ചത്. ചാമ്പ്യൻസ് ലീഗ് യോഗ്യതക്ക് ജയം അനിവാര്യമായിരുന്നു ടോട്ടൻഹാമിന് ഇന്നത്തെ മത്സരം സമനിലയിൽ ആയത് വമ്പൻ തിരിച്ചടിയാണ്. അതെ സമയം മത്സരത്തിന്റെ അവസാന മിനുട്ടിൽ സൂപ്പർ താരം ഹാരി കെയ്‌നിന്റെ പരിക്കും ടോട്ടൻഹാമിന് തിരിച്ചടിയായി.
മത്സരത്തിൽ ടോട്ടൻഹാമിന്റെ രണ്ട് ഗോളുകളും ഹരി കെയ്ൻ ആയിരുന്നു നേടിയത്. എന്നാൽ മത്സരം അവസാനിക്കാൻ നിമിഷങ്ങൾ മാത്രം ബാക്കി നിൽക്കെ ഹാരി കെയ്ൻ പരിക്കേറ്റ് പുറത്തുപോവുകയായിരുന്നു. കാരബാവോ കപ്പ് ഫൈനലിൽ മാഞ്ചസ്റ്റർ സിറ്റിയെ നേരിടാൻ ദിവസങ്ങൾ മാത്രം ബാക്കി നിൽക്കെ ഹാരി കെയ്‌നിന്റെ പരിക്ക് ടോട്ടൻഹാമിന് വമ്പൻ തിരിച്ചടിയാണ്. താരത്തിന്റെ ആംഗിളിനാണ് പരിക്കേറ്റത്.
മത്സരത്തിന്റെ ആദ്യ പകുതിയിൽ ഹാരി കെയ്‌നിന്റെ ഗോളിലൂടെ ടോട്ടൻഹാം ആണ്‌ മത്സരത്തിൽ മുൻപിൽ എത്തിയത്. എന്നാൽ അധികം വൈകാതെ സിഗേഴ്സൺ പെനാൽറ്റിയിലൂടെ എവർട്ടണ് സമനില നേടിക്കൊടുത്തു. തുടർന്ന് രണ്ടാം പകുതിയിൽ സിഗേഴ്സൺ തന്നെ എവർട്ടണ് വേണ്ടി രണ്ടാമത്തെ ഗോൾ നേടിയെങ്കിലും ഹരിഃ കെയ്ൻ വീണ്ടും ഗോൾ നേടി ടോട്ടൻഹാമിന് സമനില നേടികൊടുക്കുകയായിരുന്നു.
