പ്രീമിയർ ലീഗിൽ ഇന്ന് നടന്ന മത്സരത്തിൽ നിർണായക വിജയവുമായി എവർടൺ. വെസ്റ്റ്ഹാമിന്റെ തട്ടകത്തിൽ നടന്ന മത്സരത്തിൽ ഡൊമിനിക് കാൾവെർട് ലൂയിന്റെ ഏക ഗോളിന്റെ പിൻബലത്തിൽ ഷോൺ ഡൈഷും സംഘവും മൂന്ന് പോയിന്റ് കാരസ്ഥമാകുകയായിരുന്നു. ഇതോടെ പോയിന്റ് പട്ടികയിൽ പതിനാറാം സ്ഥാനത്താണ് എവർടൺ. വെസ്റ്റ്ഹാം ഒൻപതാമത് തുടരുകയാണ്.
ആദ്യ പകുതിയിൽ എവർടണായിരുന്നു ചെറിയ മുൻതൂക്കം. എന്നാൽ ലഭിച്ച അവസരങ്ങൾ മുതലെടുക്കാൻ ആവർക്കായില്ല. തുടക്കത്തിൽ മികച്ച നീക്കങ്ങൾ നടത്തിയ വെസ്റ്റ്ഹാം പിന്നീട് പിറകോട്ടു പോയി. പക്വെറ്റയുടെ പാസിൽ ബോക്സിനുള്ളിൽ ബോവന് ലഭിച്ച മികച്ച അവസരം ലക്ഷ്യം കാണാൻ ആയില്ല. ഹാരിസന്റെ ഷോട്ട് അരെയോള കൈക്കലാക്കി. മാക്നീലിന്റെ ക്രോസിൽ നിന്നും ഒനാനയുടെ ഹെഡർ ശ്രമവും ലക്ഷ്യം കണ്ടില്ല.
രണ്ടാം പകുതിയിലും ഇരു ടീമുകളും അവസരം സൃഷ്ടിച്ചു. വാർഡ് പ്രോസിന്റെ ഫ്രീകിക്കിൽ നിന്നും ബോവന്റെ ഹെഡർ പോസ്റ്റിൽ നിന്നും അകന്ന് പോയി. 51ആം മിനിറ്റിൽ എവർടൻ ലീഡ് എടുത്തു. ഹാരിസന്റെ പാസ് സ്വീകരിച്ച് ബോക്സിനുള്ളിൽ എതിർ താരങ്ങളെ മറികടന്ന് കാൾവേർട് ലുയിനാണ് ഗോൾ കണ്ടെത്തിയത്. ബോവന്റെ ലോങ് റേഞ്ച് ശ്രമം ഫലം കാണാതെ പോയി. ഡോക്കോറെയുടെ ഹെഡർ ശ്രമവും ലക്ഷ്യം കണ്ടില്ല. കാൾവെർട് ലൂയിന്റെ മറ്റൊരു ഷോട്ട് പോസ്റ്റിന് മുകളിലൂടെ കടന്ന് പോയി. അവസാന നിമിഷങ്ങളിൽ എതിർ ബോക്സിന് ചുറ്റും തമ്പടിച്ച വെസ്റ്റ്ഹാം സമനില ഗോളിനായി ശ്രമം ശക്തമാക്കി. എന്നാൽ എവർടൻ പ്രതിരോധം ഉറച്ചു നിന്നതോടെ വെസ്റ്റ്ഹാമിന്റെ പ്രതീക്ഷകൾ അവസാനിച്ചു.
