പ്രീമിയർ ലീഗിൽ സ്വന്തം മൈതാനത്ത് എവർട്ടന് മികച്ച ജയം. ക്രിസ്റ്റൽ പലസിനെ 3-1 ന് മറികടന്നാണ് അവർ പോയിന്റ് ടേബിളിൽ ഏഴാം സ്ഥാനത്തേക്ക് ഉയർന്നത്. പാലസ് 14 ആം സ്ഥാനത്ത് തന്നെ തുടരും. ആക്രമണ നിര നടത്തിയ മികച്ച പ്രകടനമാണ്‌ ആഞ്ചലോട്ടിയുടെ ടീമിന് ശക്തമായ അടിത്തറ ഒരുക്കിയത്.
ആദ്യ പകുതിയിൽ എവർട്ടൻ വ്യക്തമായ ആധിപത്യമാണ് പുലർത്തിയത്. കളിയുടെ 18 ആം മിനുട്ടിൽ തന്നെ ലീഡ് എടുക്കാൻ അവർക്കായി. തിയോ വാൽകോട്ടിന്റെ പാസിൽ നിന്ന് ബർണാഡ് ആണ് ഗോൾ നേടിയത്. പക്ഷെ രണ്ടാം പകുതി ആറ് മിനുട്ട് പിന്നിട്ടപ്പോൾ തന്നെ പാലസ് കളിയിൽ സമനില പിടിച്ചു. സാഹയുടെ അസിസ്റ്റിൽ ക്രിസ്റ്റിയൻ ബെന്റക്കെ ആണ് ഗോൾ നേടിയത്. പക്ഷെ 58 ആം മിനുട്ടിൽ റിച്ചാർലിസൻ എവർട്ടന്റെ രക്ഷക്ക് എത്തി. കാല്വര്ട്ട് ലെവിന്റെ പാസ്സ് ഗോളാക്കി താരം സ്വന്തം ടീമിന്റെ ലീഡ് പുനഃസ്ഥാപിചു. പിന്നീട് കളി തീരാൻ 2 മിനുട്ട് മാത്രം ശേഷിക്കെ ലെവിൻ കൂടെ പാലസ് വല കുലുക്കിയതോടെ ആഞ്ചലോട്ടിക്ക് കീഴിൽ മറ്റൊരു ജയം കൂടെ ടോഫീസിന് സ്വന്തമായി.
