പ്രീമിയർ ലീഗിൽ ഇന്ന് നടന്ന മത്സരത്തിൽ സമനിലയിൽ പിരിഞ്ഞു ലീഡ്സ് യുണൈറ്റഡും ബ്രെന്റ്ഫോർഡും. ലീഡ്സിന്റെ തട്ടകത്തിൽ നടന്ന മത്സരത്തിൽ ഇരു ടീമുകളും ഗോൾരഹിതമായി പിരിയുകയായിരുന്നു. ഇതോടെ ബ്രെന്റ്ഫോർഡിന്റെ എട്ടാം സ്ഥാനം ഭീഷണിയിലായി. ലീഡ്സ് ആവട്ടെ റെലെഗെഷൻ സോണിൽ നിന്നും ഒരേയൊരു പോയിന്റ് മാത്രം അകലെ പതിനഞ്ചാം സ്ഥാനത്താണ്.
തുടക്കത്തിലെ കുറച്ചു നിമിഷങ്ങൾ ഒഴിച്ചു നിർത്തിയാൽ സ്വന്തം തട്ടകത്തിൽ ലീഡ്സിന് തന്നെ ആയിരുന്നു മേൽകൈ. ഇരു ടീമുകളും പ്രതിരോധം കടുപ്പിച്ചപ്പോൾ ബ്രെൻറ്ഫോർഡിന് ഒരിക്കൽ പോലും ലക്ഷ്യത്തിലേക്ക് ഉന്നം വെക്കാൻ ആയില്ല. ലീഡ്സിന് ആവട്ടെ എതിർ ഗോളിയെ പരീക്ഷിക്കാൻ ആയെങ്കിലും ഗോൾ കണ്ടെത്തുന്നതിൽ പിഴച്ചു. എതിർ പ്രതിരോധത്തിന് കനത്ത സമ്മർദ്ദം ചെലുത്തി തന്നെയാണ് ലീഡ്സ് ആദ്യാവസാനം കളി മെനഞ്ഞത്. എന്നാൽ നീക്കങ്ങൾ ഒന്നും ഗോളാക്കി മാറ്റാൻ അവർക്കായില്ല. കൗണ്ടർ അറ്റാക്കിന് പതിയിരുന്ന ബ്രെന്റ്ഫോർഡിന് മികച്ച അവസരങ്ങൾ സൃഷ്ടിച്ചെടുക്കാൻ പോലും സാധിച്ചില്ല. അർധാവസരങ്ങൾ മുതലെടുക്കാനുള്ള ലീഡ്സിന്റെ ശ്രമങ്ങൾക്ക് മുന്നിൽ റയ വിലങ്ങു തടിയായി നിന്നു. രണ്ടാം പകുതിയിൽ ഗ്നോട്ടോയുടെയും റോഡ്രിഗോയുടെയും ഷോട്ടുകൾ താരം തടുത്തു.
