ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡ് ആസ്റ്റൺ വില്ലയെ തോൽപ്പിച്ചു. ഇന്ന് വില്ലാ പാർക്കിൽ നടന്ന മത്സരത്തിൽ ഒന്നിനെതിരെ രണ്ടു ഗോളുകൾക്ക് ആണ് മാഞ്ചസ്റ്റർ യുണൈറ്റഡ് വിജയിച്ചത്. യുണൈറ്റഡിനായി മത്സരം അവസാനിക്കാൻ നാലു മിനുട്ട് മാത്രം ബാക്കിയിരിക്കെ മക്ടോമിനെ ആണ് വിജയ ഗോൾ നേടിയത്.
ഇന്ന് വില്ല പാർക്കിൽ മികച്ച രീതിയിൽ തുടങ്ങാൻ മാഞ്ചസ്റ്റർ യുണൈറ്റഡിനായി. പോസിറ്റീവ് ആയി കളിച്ച അവർക്ക് 17ആം മിനുട്ടിൽ ലീഡ് എടുക്കാനായി. ഒരു കോർണറിൽ നിന്നായിരുന്നു യുണൈറ്റഡിന്റെ ഗോൾ. ബ്രൂണോ ഫെർണാണ്ടസ് എടുത്ത കോർണർ മഗ്വയർ ഹെഡ് ചെയ്ത് മുന്നിലേക്ക് ഇട്ടപ്പോൾ ആ അവസരം മുതലെടുത്ത് ഒരു ടാപിന്നിലൂടെ റാസ്മസ് ഹൊയ്ലുണ്ട് മാഞ്ചസ്റ്റർ യുണൈറ്റഡിന് ലീഡ് നൽകി.
ഹൊയ്ലുണ്ടിന്റെ അവസാന അഞ്ച് മത്സരങ്ങൾക്ക് ഇടയിലെ അഞ്ചാം ഗോളായിരുന്നു ഇത്. ഈ ഗോളിന് ശേഷം യുണൈറ്റഡ് ഡിഫൻസിൽ ഊന്നി കളിക്കാൻ തുടങ്ങി. ഒനാനയുടെ രണ്ട് ഗംഭീര സേവുകൾ സ്കോർ 1-0 എന്ന് തന്നെ സ്കോർ നിലനിർത്തി.
രണ്ടാം പകുതിയിൽ പരിക്ക് കാരണം ലൂക് ഷോയെ നഷ്ടമായത് യുണൈറ്റഡിന് തിരിച്ചടിയായി. ആസ്റ്റൺ വില്ല തുടരെ ആക്രമണങ്ങൾ നടത്തി. 66ആം മിനുട്ടിൽ ആസ്റ്റൺ വില്ല ഡഗ്ലസ് ലൂയിസിലൂടെ സമനില കണ്ടെത്തി. സ്കോർ 1-1.
86ആം മിനുട്ടിൽ മക്ടോമിനെയിലൂടെ മാഞ്ചസ്റ്റർ യുണൈറ്റഡ് വീണ്ടും ലീഡ് എടുത്തു. ഡാലോട്ട് നൽകിയ ക്രോസിൽ നിന്ന് മികച്ച ഹെഡറിലൂടെ ആണ് മക്ടോമിനെ യുണൈറ്റഡിന്റെ രണ്ടാം ഗോൾ നേടിയത്. സ്കോർ 2-1.
ഈ വിജയത്തോടെ മാഞ്ചസ്റ്റർ യുണൈറ്റഡ് 41 പോയിന്റുമായി ആറാം സ്ഥാനത്ത് നിൽക്കുകയാണ്. 46 പോയിന്റുമായി ആസ്റ്റൺ വില്ല അഞ്ചാം സ്ഥാനത്തും നിൽക്കുന്നു.
