നിലവിലുള്ള പ്രതിരോധം വെച്ച് ആഴ്‌സണലിന് പ്രീമിയർ ലീഗ് കിരീടം നേടാനാവില്ലെന്ന് മുൻ ലോകകപ്പ് ജേതാവും ആഴ്‌സണൽ ഇതിഹാസവുമായിരുന്ന ഇമ്മാനുവൽ പെറ്റിറ്റ്. ആഴ്‌സണലിന്റെ കാർഡിഫ് സിറ്റിക്കെതിരായ മത്സരത്തിന് ശേഷമാണു മുൻ താരത്തിന്റെ പരാമർശം. ആദ്യ നാല് മത്സരങ്ങളിൽ നിന്ന് ആഴ്‌സണൽ പ്രതിരോധം 8 ഗോളുകളാണ് വഴങ്ങിയത്. ആദ്യ മൂന്ന് മത്സരങ്ങളിലും ഗോൾ കണ്ടെത്താനാവാതെ പോയ കാർഡിഫ് സിറ്റി ആഴ്‌സണലിനെതിരെ രണ്ടു ഗോളുകൾ നേടിയിരുന്നു.
ആർസൻ വെങ്ങറുടെ കാലഘട്ടത്തിലും പ്രതിരോധം ശക്തിപ്പെടുത്താൻ ആഴ്‌സണൽ ശ്രമിച്ചിരുന്നില്ലെന്നും പെറ്റിറ്റ് പറഞ്ഞു. ഒബാമയങ്ങും ലാകസെറ്റെയും ഒരുമിച്ച് കളിക്കുകയാണെങ്കിൽ ഇരുവരും കൂടി 40-50 ഗോൾ നേടുമെന്നും ഫ്രഞ്ച് ലോകകപ്പ് ജേതാവായ പെറ്റിറ്റ് പറഞ്ഞു. എന്നാൽ ഇരുവരും അത്ര ഗോൾ നേടിയാലും ഈ പ്രതിരോധം വെച്ച് പ്രീമിയർ ലീഗിൽ ആദ്യ മൂന്ന് സ്‌ഥാനങ്ങളിൽ ആഴ്‌സണൽ സീസൺ അവസാനിപ്പിക്കല്ലെന്നും പെറ്റിറ്റ് കൂട്ടിച്ചേർത്തു.
