കൊച്ചിക്ക് മുൻ ഇന്ത്യൻ ക്രിക്കറ്റ് താരത്തിന്റെ വക ഒരു ഫുട്ബോൾ ക്ലബ്. മുൻ ഇന്ത്യൻ ക്രിക്കറ്റ് താരമായിരുന്ന ടിനു യോഹന്നാൻ ആണ് കൊച്ചിക്ക് പുതിയ ഫുട്ബോൾ ക്ലബ്ബുമായി രംഗത്ത് എത്തിയത്. എഫ്.സി കൊച്ചി എന്ന് പേരിട്ടിരിക്കുന്ന ക്ലബ് ഈ വർഷത്തെ കേരള പ്രീമിയർ ലീഗിൽ കളിക്കാനുള്ള തയ്യാറെടുപ്പിലാണ്. ടിനു യോഹന്നാനു പുറമെ ക്ലബ്ബിന്റെ സഹ ഉടമയായി ഉള്ളത് ഫിസിക്കൽ എഡ്യൂക്കേഷൻ ട്രെയിനറായ ജോജി മാത്യുവാണ്. കൂടുതൽ യുവ താരങ്ങളെ വളർത്തിക്കൊണ്ടു വരുക എന്നത് മുൻപിൽ കണ്ടുകൊണ്ടാണ് ക്ലബ് തുടങ്ങിയതെന്ന് ടിനു യോഹന്നാൻ പറഞ്ഞു.
അതെ സമയം നേരത്തെ നിലവിലുണ്ടായിരുന്ന ഇന്ത്യയിലെ ആദ്യ പ്രഫഷണൽ ക്ലബ് ആയിരുന്ന എഫ്.സി കൊച്ചിനുമായി പുതിയ ക്ലബിന് യാതൊരു ബന്ധവുമില്ല. മുൻ കേരള ബ്ലാസ്റ്റേഴ്സ് താരമായ അജിത് ശിവൻ, സന്തോഷ് ട്രോഫി താരങ്ങളായ വിബിൻ അജയൻ, റഫീഖ് എന്നിവരെ കേരള പ്രീമിയർ ലീഗ് മുൻപിൽ കണ്ടുകൊണ്ട് എഫ്.സി കൊച്ചി സ്വന്തമാക്കിയിട്ടുണ്ട്. സോളി സേവ്യറാണ് എഫ് സി കൊച്ചിയുടെ പരിശീലകൻ. സഹ പരിശീലകനായി സനൽ കുമാറുമുണ്ട്.
