മാഞ്ചസ്റ്റർ സിറ്റിക്ക് വിജയം! ആഴ്സണലിന് 2 പോയിന്റ് മാത്രം പിറകിൽ

ഇത്തിഹാദ് സ്റ്റേഡിയത്തിൽ നടന്ന പ്രീമിയർ ലീഗ് മത്സരത്തിൽ സണ്ടർലാൻഡിനെ 3-0 ന് തകർത്ത് മാഞ്ചസ്റ്റർ സിറ്റി പോയിന്റ് പട്ടികയിൽ രണ്ടാം സ്ഥാനത്തേക്ക് മുന്നേറി. നിലവിൽ 31 പോയിന്റുള്ള സിറ്റി, ഒന്നാം സ്ഥാനത്തുള്ള ആഴ്‌സണലിനേക്കാൾ രണ്ട് പോയിന്റ് മാത്രം പിന്നിലാണ് ഇപ്പോൾ. ഇന്ന് ആഴ്സണൽ ആസ്റ്റൺ വില്ലയോട് നേരത്തേ പരാജയപ്പെട്ടിരുന്നു.

റൂബൻ ഡയസ് (31-ാം മിനിറ്റ്), ജോസ്‌കോ ഗ്വാർഡിയോൾ (35-ാം മിനിറ്റ്), ഫിൽ ഫോഡൻ (65-ാം മിനിറ്റ്) എന്നിവരുടെ ഗോളുകളാണ് പെപ് ഗ്വാർഡിയോളയുടെ ടീമിന് ആധികാരിക വിജയം സമ്മാനിച്ചത്. സണ്ടർലാൻഡ് ഇന്ന്, സിറ്റിയുടെ ആക്രമണത്തിന് മുന്നിൽ പതറി. ആദ്യ പകുതിയിൽ അവർക്ക് ഒരു ഷോട്ട് പോലും ലക്ഷ്യത്തിലേക്ക് തൊടുക്കാൻ കഴിഞ്ഞില്ല.

സിറ്റിക്കായി റയാൻ ഷെർക്കി, ഡയസിന് നൽകിയ കൃത്യമായ പാസിലൂടെയാണ് ആദ്യ ഗോളിന് വഴിയൊരുക്കിയത്. ഡയസ് പെനാൽറ്റി ഏരിയയ്ക്ക് പുറത്തുനിന്ന് തൊടുത്ത ശക്തമായ ഷോട്ട് വലയുടെ മുകളിലത്തെ മൂലയിലേക്ക് തുളച്ചുകയറി. ഇത് താരത്തിന്റെ സീസണിലെ രണ്ടാം ഗോളാണ്. നാല് മിനിറ്റിന് ശേഷം ഫിൽ ഫോഡൻ എടുത്ത കോർണർ കിക്കിൽ നിന്ന് ഗ്വാർഡിയോൾ തലകൊണ്ട് വലയിലേക്ക് പന്തെത്തിച്ചു. ഗ്വാർഡിയോളിന്റെ സീസണിലെ രണ്ടാം ഗോളാണിത്.

രണ്ടാം പകുതിയിൽ ചെർക്കിയുടെ മറ്റൊരു അസിസ്റ്റിൽ (സീസണിലെ നാലാമത്തെ അസിസ്റ്റ്) ഫിൽ ഫോഡൻ തന്റെ ആറാം ഗോൾ നേടി ലീഡ് 3-0 ആയി ഉയർത്തി.
സണ്ടർലാൻഡ് അവസാന നിമിഷങ്ങളിൽ കോർണറുകളിലൂടെയും ഫ്രീ കിക്കുകളിലൂടെയും ആക്രമിക്കാൻ ശ്രമിച്ചെങ്കിലും ലക്ഷ്യം കണ്ടില്ല. ഇഞ്ചുറി ടൈമിൽ പകരക്കാരനായി ഇറങ്ങിയ ലൂക്ക് ഒ’നൈയന് ചുവപ്പ് കാർഡ് ലഭിച്ചതോടെ അവർ 10 പേരായി കളി അവസാനിപ്പിച്ചു.