ബാഴ്സലോണ പരിശീലകൻ സാവിയെ ക്ലബ് പുറത്താക്കി. സീസണിൽ ഒരു മത്സരം ശേഷിക്കെ ആണ് ക്ലബിന്റെ പ്രഖ്യാപനം വരുന്നത്. രണ്ട് മാസം മുമ്പ് ക്ലബ് മാനേജ്മെന്റും സാവിയും തമ്മിലുള്ള ചർച്ചകൾക്ക് ഒടുവിൽ സാവി അടുത്ത സീസണും ക്ലബിനൊപ്പം ഉണ്ടാകും എന്ന് തീരുമാനമായിരുന്നു. എന്നാൽ വീണ്ടും മാനേജ്മെന്റുമായി പ്രശ്നമായതിനാൽ സാവിയെ പുറത്താക്കാൻ തന്നെ മാനേജ്മെന്റ് തീരുമാനിക്കുക ആയിരുന്നു. ഹാൻസി ഫ്ലിക്ക് സാവിക്ക് പകരം ബാഴ്സയിൽ എത്തും എന്നാണ് സൂചന.
സാവിയുടെ കീഴിൽ ഈ സീസണിൽ ചാമ്പ്യൻസ് ലീഗിലും ലാലിഗയിലും നിരാശയാർമ്മ പ്രകടനങ്ങൾ ആയിരുന്നു ബാഴ്സലോണ കാഴ്ചവെച്ചത്. ലാലിഗ പോയിന്റ് ടേബിളിൽ ഇപ്പോൾ ചാമ്പ്യന്മാരായ റയൽ മാഡ്രിഡിന് 12 പോയിൻ്റു പിറകിലാണ് ബാഴ്സലോണ ഉള്ളത്. കഴിഞ്ഞ സീസണിൽ ബാഴ്സലോണയെ ലാലിഗ കിരീടത്തിൽ എത്തിക്കാൻ സാവിക്ക് ആയിരുന്നു. എന്നാൽ ഈ സീസണിൽ പരിക്കുകളും സാമ്പത്തിക പ്രതിസന്ധിയും സാവിക്ക് കാര്യങ്ങൾ മുന്നോട്ട് നീക്കുന്നതിന് തടസ്സമായി.
