റയൽ മാഡ്രിഡിൽ കരിയർ അവസാനിപ്പിക്കാനാണ് ആഗ്രഹിക്കുന്നതെന്ന് പറഞ്ഞ് റയലിന്റെ ജർമ്മൻ സൂപ്പർ താരം ടോണി ക്രൂസ്. ചൈനയിലോ അമേരിക്കയിലോ ഖത്തറിലോ കളിക്കാൻ താൻ താത്പര്യപ്പെടുന്നില്ലെന്നും റയൽ മാഡ്രിഡിൽ തന്നെ കളി അവസാനിപ്പിക്കാനാണ് ഇഷ്ടമെന്നും ടോണി ക്രൂസ് കൂട്ടിച്ചേർത്തു. 2014ലാണ് ബയേണ്‍ മ്യൂണിക്കില്‍ നിന്നും റയല്‍ മാഡ്രിഡിലേക്ക് ടോണി ക്രൂസ് ചുവട് മാറ്റിയത്.
25 മില്യണ്‍ യൂറോയ്ക്കാണ് ക്രൂസിനെ റയൽ മാഡ്രിഡിലേക്കെത്തിച്ചത്. 2023വരെയുള്ള കരാറിൽ ടോണി ക്രൂസ് ഒപ്പുവെച്ചിട്ടുണ്ട്. 33 വയസിൽ ഫുട്ബോളിൽ നിന്നും റിട്ടയർ ചെയ്യാൻ നല്ല സമയമാണെന്നാണ് ക്രൂസ് പറയുന്നത്. 2014ൽ ജർമ്മനിക്ക് ഒപ്പം ലോകകപ്പ് ഉയർത്താനും ക്രൂസിനായിരുന്നു. റയല്‍ മാഡ്രിഡിനോടൊപ്പം തുടര്‍ച്ചയായ മൂന്നു തവണ ചാമ്പ്യന്‍സ് ലീഗ് ഉയര്‍ത്താന്‍ ടോണി ക്രൂസിനായിട്ടുണ്ട്. ബയേണിനൊപ്പം ചാമ്പ്യൻസ് ലീഗും മൂന്ന് തവണ ബുണ്ടസ് ലീഗയും ടോണി ക്രൂസ് സ്വന്തമാക്കിയിട്ടുണ്ട്.
