ക്രിസ്റ്റ്യാനോ റൊണാൾഡോ ഇരട്ട ഗോളടിച്ച മത്സരത്തിൽ വലൻസിയയെ 4-1ന് തോൽപ്പിച്ച് റയൽ മാഡ്രിഡ് ല ലിഗയിൽ വിജയ വഴിയിൽ തിരിച്ചെത്തി. റയൽ മാഡ്രിഡിന്റെ മറ്റു ഗോളുകൾ മാഴ്‌സെലോയും ടോണി ക്രൂസും നേടി. വലൻസിയയുടെ ആശ്വാസ ഗോൾ സാന്റി മിനയുടെ കാലിൽ നിന്നായിരുന്നു.
ആദ്യ പകുതിയിൽ കിട്ടിയ രണ്ട് പെനാൽറ്റി ഗോളാക്കിയാണ് റൊണാൾഡോ റയൽ മാഡ്രിഡിന് ലീഡ് നേടി കൊടുത്തത്. മത്സരത്തിന്റെ 16മത്തെയും 38മത്തെയും മിനുട്ടിലാണ് റൊണാൾഡോ ഗോൾ നേടിയത്. തുടർന്ന് രണ്ടാം പകുതിയിൽ സാന്റി മിനയിലൂടെ വലൻസിയ ഒരു ഗോൾ മടക്കി മത്സരത്തിലേക്ക് തിരിച്ച് വന്നെങ്കിലും 84ആം മിനുട്ടിലും 89ആം മിനുട്ടിലും ഗോൾ നേടി റയൽ മാഡ്രിഡ് മത്സരത്തിൽ ജയം ഉറപ്പിക്കുകയായിരുന്നു. മാഴ്‌സെലോയും ടോണി ക്രൂസുമാണ് മത്സരത്തിന്റെ അവസാന മിനിറ്റുകളിൽ റയൽ മാഡ്രിഡിന് വേണ്ടി ഗോലുകൾ നേടിയത്.
ജയത്തോടെ റയൽ മാഡ്രിഡ് 20 മത്സരങ്ങളിൽ നിന്ന് 38 പോയിന്റോടെ നാലാം സ്ഥാനത്താണ്. 21 മത്സരങ്ങളിൽ നിന്ന് 40 പോയിന്റുമായി വലൻസിയ ലീഗിൽ മൂന്നാം സ്ഥാനത്താണ്.
കൂടുതൽ കായിക വാർത്തകൾക്ക് : www.facebook.com/FanportOfficial
