റയൽ മാഡ്രിഡ് മധ്യനിര താരം ടോണി ക്രൂസ് ഈ സീസൺ അവസാനത്തോടെ വിരമിക്കാൻ സാധ്യത ഉണ്ടെന്നുള്ള അഭ്യൂഹങ്ങൾക്ക് അവസാനം. ക്രൂസ് റയൽ മാഡ്രിഡിൽ പുതിയ കരാർ ഒപ്പുവെച്ചതായി ഫബ്രിസിയോ റൊമാനോ റിപ്പോർട്ട് ചെയ്യുന്നു. ഈ സീസൺ അവസാനത്തോടെ റയൽ മാഡ്രിഡിലെ കരാർ അവസാനിക്കാൻ ഇരിക്കെയാണ് ക്രൂസ് കരാർ ഒപ്പുവെക്കുന്നത്. 2024 ജൂൺ വരെയാണ് കരാർ.
റയൽ മാഡ്രിഡ് തന്റെ അവസാന ക്ലബ് ആയിരിക്കും എന്ന് പറഞ്ഞു ക്രൂസ്, റയൽ കരാർ പുതുക്കിയില്ലായിരുന്നു എങ്കിൽ ഫുട്ബോളിൽ നിന്ന് വിരമിച്ചേനെ. വേറെ ഒരു ക്ലബുമായും ചർച്ചകൾ നടത്താൻ ക്രൂസ് തയ്യാറായിരുന്നില്ല. 33കാരനായ താരത്തിന്റെ കരാർ പുതുക്കിയ റയൽ ഇനി മോഡ്രിചിന്റെ കരാർ പുതുക്കാനുള്ള ചർച്ചകൾ ആരംഭിക്കും.
2014ൽ ആയിരുന്നു ക്രൂസ് റയൽ മാഡ്രിഡിൽ എത്തിയത്. റയലിനൊപ്പം നിരവധി കിരീടങ്ങൾ താരം നേടി. നാലു ചാമ്പ്യൻസ് ലീഗ് കിരീടങ്ങളും മൂന്ന് ലാലിഗ കിരീടവും ഉൾപ്പെടെ 17 കിരീടങ്ങൾ താരം റയൽ മാഡ്രിഡിൽ സ്വന്തമാക്കി.
