വലൻസിയയുടെ ഇന്ത്യൻ വംശജനായ പ്രസിഡന്റ് അനിൽ മൂർത്തിക്ക് വധ ഭീഷണി. ഫോണിലൂടെ ക്ലബ്ബ് പ്രസിഡന്റിന് വധ ഭീഷണി ഉണ്ടായിയെന്ന് ക്ലബ്ബ് സ്ഥിതീകരിച്ചു. അലാവെസിനെതിരായ വലൻസിയയുടെ മത്സരത്തിന് മുന്നോടിയായാണ് മൂർത്തിക്ക് വധ ഭീഷണിയുണ്ടായത്. മൂർത്തിയും ക്ലബ്ബ് ഓണർ പീറ്റർ ലിമും വലൻസിയ ആരാധകരുടെ കനത്ത പ്രതിഷേധങ്ങളാണ് നേരിടുന്നത്. മത്സരത്തിനിടെയും സ്റ്റാൻഡിൽ നിന്നും പ്രതിഷേധ ശബ്ദങ്ങൾ ഉയർന്നു.
കോപ്പ ഡെൽ റേ വലൻസിയക്ക് നേടിക്കൊടുത്ത കോച്ച് മാഴ്സലീനോയെ പുറത്താക്കിയതിന് പിന്നാലെയാണ് ശക്തമായ പ്രതിഷേധവുമായി ആരാധകർ രംഗത്ത് വന്നത്. പകരക്കാരനായി ആൽബർട്ട് സെലാദെസിനെയാണ് ക്ലബ്ബ് മാനേജ്മെന്റ് കൊണ്ടുവന്നത്. സെലദെസിന് കീഴിൽ വലൻസിയ ലാ ലീഗയിൽ രണ്ട് ജയവും രണ്ട് സമനിലയും നേടി. ചാമ്പ്യൻസ് ലീഗിൽ ചെൽസിക്കെതിരായ മത്സരത്തിന് മുന്നോടിയായാണ് മാഴ്സലീനോയെ ക്ലബ്ബ് പുറത്താക്കിയത്. തുടർച്ചയായ രണ്ട് സീസണ ടോപ്പ് ഫോർ ഫിനിഷുകൾ നൽകാൻ മാഴ്സലീനോക്കായിരുന്നു. ഇന്റർനാഷ്ണൽ ബ്രേക്കിന് ശേഷം മാഡ്രിഡിൽ അത്ലെറ്റിക്കോക്കെതിരെയാണ് വലൻസിയയുടെ ലാ ലീഗ മത്സരം നടക്കുക.
