റോബർട്ട് ലെവൻഡോവ്‌സ്‌കിയും റാഫിഞ്ഞയും ഇരട്ട ഗോളുകൾ നേടിയ മത്സരത്തിൽ ബാഴ്സലോണ വിയ്യാറയലിനെതിരെ 5-1ന് വിജയിച്ചു. ഇന്ന് സമ്പൂർണ്ണ ആധിപത്യം പുലർത്താൻ ബാഴ്സലോണക്ക് ആയി.
20-ാം മിനിറ്റിൽ ലെവൻഡോവ്‌സ്‌കി ഒരു പന്ത് ലോ കോർണറിൽ സ്ലോട്ട് ചെയ്‌ത് ലീഡ് നേടി. 15 മിനിറ്റിനുശേഷം ലാമിൻ യമാൽ നൽകിയ ക്രോസ് ഒരു ഓവർഹെഡ് കിക്കിലൂടെ ലെവൻഡോസ്കി വലയിൽ എത്തിച്ച് ബാഴ്‌സയുടെ ലീഡ് ഇരട്ടിയാക്കി.
38-ാം മിനിറ്റിൽ പെരെസ് ഗോൾ നേടിയപ്പോൾ വിയ്യറയൽ കളിയിലേക്ക് മടങ്ങിയെത്തി. എന്നാൽ ബാഴ്സലോണ അവരുടെ ആധിപത്യം വേഗത്തിൽ പുനഃസ്ഥാപിച്ചു. 58-ാം മിനിറ്റിൽ പാബ്ലോ ടോറെ ഒരു സ്‌ട്രൈക്കിലൂടെ സ്കോർ 3-1 എന്നാക്കി, തുടർന്ന് 74, 83 മിനിറ്റുകളിൽ റാഫിഞ്ഞ നേടിയ രണ്ട് ഗോളുകൾ വിജയം ഉറപ്പിച്ചു.
ഈ വിജയത്തോടെ ബാഴ്സലോണ ലീഗിൽ ഒന്നാമത് തുടരുകയാണ്.
