ബാഴ്സലോണയുടെ സൂപ്പർ താരം ഡെംബെലെയെ ക്യാമ്പ് നൂവിൽ കൂവിവിളികളുമായി വരവേറ്റ് ആരാധകർ. നാപോളിക്കെതിരായ മത്സരത്തിലാണ് ഒസ്മാൻ ഡെംബെലെ കളത്തിലിറങ്ങിയപ്പോൾ ബാഴ്സലോണ ആരാധകർ തങ്ങളുടെ വികാരം പ്രകടിപ്പിച്ചത്. എന്നാൽ അതിന് പിന്നാലെ ഡെംബെലെക്ക് പിന്തുണയുമായി ബാഴ്സ ഇതിഹാസം യോഹാൻ ക്രൈഫിന്റെ മകനും മുൻ താരവുമായ ജോർദി ക്രൈഫ് രംഗത്തെത്തി. ബാഴ്സലോണ ജേഴ്സി അണിയുന്ന താരത്തെ ആദ്യ ദിനം മുതൽ അവസാന ദിനം വരെ ആരാധകർ പിന്തുണയ്ക്കണം എന്നാണ് ജോർദി അഭിപ്രായപ്പെട്ടത്.
ബാഴ്സ ആരാധകർ വിചാരിച്ചത് പോലെ കരാർ എക്സ്ന്റൻഷൻ നടക്കണമെന്നില്ല. പക്ഷേ കോച്ച് വിശ്വാസമർപ്പിച്ച് ഒരു താരത്തെ കളത്തിൽ ഇറക്കിയാൽ പൂർണപിന്തുണ ആരാധകർ നൽകണമെന്നും ജോർദി ക്രൈഫ് പറഞ്ഞു. ബാഴ്സലോണയുടെ ഡെംബെലെയുമായുള്ള കരാർ ചർച്ചകൾ പരാജയപ്പെട്ടിരുന്നു. ഈ സീസൺ അവസാനത്തോടെ ഡെംബെലെ ബാഴ്സ വിടും. 2022ൽ ആദ്യമായാണ് ക്യാമ്പ് നൂവിൽ ഡെംബെലെ ഇറങ്ങുന്നത്. നാപോളിക്കെതിരെ ബാഴ്സ സമനില വഴങ്ങിയെങ്കിലും താരം ഭേദപ്പെട്ട പ്രകടനമാണ് കാഴ്ച്ചവെച്ചത്.
