കേരള പ്രീമിയർ ലീഗിൽ കേരള യുണൈറ്റഡ് വീണ്ടും ചാമ്പ്യന്മാർ. ഇന്ന് കണ്ണൂർ മുനിസിപ്പൽ സ്റ്റേഡിയത്തിൽ നടന്ന മത്സരത്തിൽ സാറ്റ് തിരൂരിനെ തോൽപ്പിച്ച് കൊണ്ട് കേരള യുണൈറ്റഡ് തുടർച്ചയായ രണ്ടാം സീസണിലും കേരളത്തിന്റെ ചാമ്പ്യന്മാരായി. ഇന്ന് ഒരു ഗോളിന് പിറകിൽ പോയ ശേഷം തിരിച്ചടിച്ച് 3-1 സ്കോറിനാണ് കേരള യുണൈറ്റഡ് വിജയിച്ചത്.
ഇന്ന് ആദ്യ പകുതിയിൽ ഗോൾ ഒന്നും പിറന്നിരുന്നില്ല. 50ആം മിനുട്ടിൽ യദുകൃഷ്ണയിലൂടെ സാറ്റ് തിരൂർ ലീഡ് എടുത്തു. കളി ഇഞ്ച്വറി ടൈമിൽ എത്തുന്നത് വരെ ആ ലീഡ് നിന്നു. 93ആം മിനുട്ടിൽ ഒരു പെനാൾട്ടിയിലൂടെ കേരള യുണൈറ്റഡിന്റെ സമനില ഗോൾ. കുകി ആയിരുന്നു ആ കിക്ക് ലക്ഷ്യത്തിൽ എത്തിച്ചത്.
ഇത് സാറ്റ് തിരൂരിനെ തകർത്തു. ഈ ഷോക്കിൽ നിൽക്കെ ഇഞ്ച്വറി ടൈമിന്റെ എട്ടാം മിനുട്ടിൽ ലിങ്കി മീതെയിലൂടെ കേരള യുണൈറ്റഡ് ലീഡ് എടുത്തു. തൊട്ടടുത്ത മിനുട്ടിൽ തുഫൈലിന്റെ ഗോളിലൂടെ കേരള യുണൈറ്റഡ് 3-1ന് മുനിലെത്തി. അപാരമായ തിരിച്ചുവരവ്. ഫൈനൽ വിസിൽ വന്നപ്പോൾ കിരീടവും ഉറപ്പായി.
