കേരള പ്രീമിയർ ലീഗിലെ ആവേശകരമായ മത്സരത്തിൽ കളിയുടെ അവസാന നിമിഷത്തിൽ സമനില ഗോളിലൂടെ കേരള ബ്ലാസ്റ്റേഴ്സിനെ വയനാട് യുണൈറ്റഡ് സമനിലയിൽ തളച്ചു. ഇന്ന് കോട്ടപ്പടി സ്റ്റേഡിയത്തിൽ നടന്ന മത്സരത്തിൽ 69-ാം മിനിറ്റിൽ അരിത്ര ദാസ് ബ്ലാസ്റ്റേഴ്സിനെ മുന്നിലെത്തിച്ചു. മത്സരം 1-0ന് ബ്ലാസ്റ്റേഴ്സ് റിസേർവ്സ് ജയിക്കുമെന്ന് എല്ലാവരും കരുതിയ സമയത്ത് 94-ാം മിനിറ്റിൽ വയനാട് യുണൈറ്റഡിനായി അബുലായി സമനില ഗോൾ നേടി. ഇതോടെ കളി 1-1 എന്ന സമനിലയിൽ അവസാനിച്ചു.
ടൂർണമെന്റിന്റെ സൂപ്പർ സിക്‌സ് ഘട്ടത്തിൽ വയനാട് യുണൈറ്റഡിന് അവരുടെ ആദ്യ രണ്ട് മത്സരങ്ങളിൽ നിന്ന് 4 പോയിന്റ് ആയി. തുവരെ കളിച്ച രണ്ട് മത്സരങ്ങളിൽ നിന്ന് ഒരു പോയിന്റ് മാത്രം നേടാനായ കേരള ബ്ലാസ്റ്റേഴ്സ് സൂപ്പർ സിക്‌സിലെ ആദ്യ വിജയത്തിനായി ഇപ്പോഴും കാത്തിരിക്കുകയാണ്.
