യൂറോപ്യൻ ഗോൾഡൻ ഷൂ ഹാരി കെയ്ന്; ബയേണിനായി റെക്കോർഡ് ഗോൾവേട്ട
ബയേൺ മ്യൂണിക്കിനായി നടത്തിയ അസാമാന്യ ഗോൾവേട്ടയ്ക്ക് പിന്നാലെ 2025–26 സീസണിലെ യൂറോപ്യൻ ഗോൾഡൻ ഷൂ പുരസ്കാരം ഇംഗ്ലണ്ട് നായകൻ ഹാരി കെയ്ൻ സ്വന്തമാക്കി. ബുന്ദസ്ലിഗയിൽ കളിച്ച 31 മത്സരങ്ങളിൽ നിന്ന് 36 ഗോളുകൾ അടിച്ചുകൂട്ടിയാണ് (72 പോയിന്റ്) കെയ്ൻ ഈ നേട്ടത്തിലെത്തിയത്. രണ്ടാം സ്ഥാനത്തുള്ള മാഞ്ചസ്റ്റർ സിറ്റിയുടെ സൂപ്പർ താരം എർലിങ് ഹാലണ്ടിനേക്കാൾ 18 പോയിന്റ് മുന്നിലാണ് താരം ഫിനിഷ് ചെയ്തത്.
ഈ സീസണിൽ ബയേണിനായി എല്ലാ ടൂർണമെന്റുകളിൽ നിന്നുമായി 51 മത്സരങ്ങളിൽ നിന്ന് 61 ഗോളുകളാണ് കെയ്ൻ അടിച്ചുകൂട്ടിയത്. ഇതിൽ ചാമ്പ്യൻസ് ലീഗിലെ 14 ഗോളുകളും ഡിഎഫ്ബി പോക്കലിലെ 10 ഗോളുകളും ഉൾപ്പെടുന്നു. കെയ്ന്റെ ഈ തകർപ്പൻ പ്രകടനമാണ് ബയേണിന് ബുന്ദസ്ലിഗ കിരീടവും ജർമ്മൻ കപ്പും നേടിക്കൊടുത്തത്.
ഈ പുരസ്കാര നേട്ടത്തോടെ, ഒന്നിലധികം തവണ ഗോൾഡൻ ഷൂ സ്വന്തമാക്കുന്ന ഗെർഡ് മുള്ളർ, റോബർട്ട് ലെവൻഡോവ്സ്കി എന്നിവരടങ്ങുന്ന ബയേൺ ഇതിഹാസങ്ങളുടെ പട്ടികയിലേക്ക് ഹാരി കെയ്നും തന്റെ പേര് കൂട്ടിച്ചേർത്തു. യൂറോപ്യൻ ഗോൾവേട്ടയിൽ കെയ്ൻ ആധിപത്യം പുലർത്തിയപ്പോഴും, ഹാലണ്ടും കിലിയൻ എംബാപ്പെയും തങ്ങളുടെ ആഭ്യന്തര ലീഗുകളിൽ മികച്ച പ്രകടനം നിലനിർത്തിയിരുന്നു. പ്രീമിയർ ലീഗിൽ തുടർച്ചയായ നാല് വർഷത്തിനിടയിൽ മൂന്നാം തവണയും ഹാലണ്ട് ഗോൾഡൻ ബൂട്ട് നേടിയപ്പോൾ, എംബാപ്പെ ലാ ലിഗയിലെ ടോപ്പ് സ്കോററായി മാറി.
വരാനിരിക്കുന്ന 2026 ലോകകപ്പിലേക്ക് മൂന്ന് സൂപ്പർ താരങ്ങളും ഇനി തങ്ങളുടെ രാജ്യങ്ങൾക്കായി ബൂട്ട് കെട്ടുമ്പോൾ ലോകം ഉറ്റുനോക്കുക വലിയൊരു പോരാട്ടത്തിനാണ്. വരാനിരിക്കുന്ന ലോകകപ്പിലെ പ്രകടനങ്ങളെ ആശ്രയിച്ചായിരിക്കും ഈ വർഷത്തെ ബാലൺ ഡി ഓർ പുരസ്കാര ജേതാവിനെ നിശ്ചയിക്കുക എന്നതിനാൽ കെയ്ൻ, ഹാലണ്ട്, എംബാപ്പെ എന്നിവർക്ക് അന്താരാഷ്ട്ര വേദിയിലെ മത്സരങ്ങൾ നിർണ്ണായകമാകും. ലോകകപ്പ് വേദിയിലും ഈ ഗോൾവേട്ട തുടരാൻ സാധിക്കുമെന്ന ആത്മവിശ്വാസത്തിലാണ് ഹാരി കെയ്ൻ.