ഏഷ്യൻ കപ്പിൽ ദക്ഷിണ കൊറിയക്ക് ജോർദാനോട് സമനില. ഇന്ന് നടന്ന ആവേശകരമായ മത്സരത്തിൽ 2-2 എന്ന നിലയിലാണ് സ്കോർ അവസാനിച്ചത്. കളിയുടെ അവസാന മിനിട്ടിൽ പിറന്ന ഒരു സെൽഫ് ഗോൾ ആണ് കൊറിയയെ പരാജയത്തിൽ നിന്ന് രക്ഷിച്ചത്. മത്സരത്തിന്റെ ഒമ്പതാം മിനിറ്റിൽ കിട്ടിയ ഒരു പെനാൽറ്റി ലക്ഷ്യത്തിൽ എത്തിച്ചുകൊണ്ട് സ്പർസ് താരം സോൺ ആണ് കൊറിയക്ക് ലീഡ് നൽകിയത്.
ആ ലീഡ് അധികനേരം നീണ്ടുനിന്നില്ല. 37ആം മിനിട്ടിൽ ഒരു സെൽഫ് ഗോളിലൂടെ ജോർദാൻ സമനില പിടിച്ചു. ആദ്യ പകുതിയുടെ അവസാന നിമിഷം അൽ നയ്മതിലൂടെ ജോർദാൻ ലീഡും എടുത്തു. രണ്ടാം പകുതിയിൽ സമനിലക്കായി അവർ ആഞ്ഞു ശ്രമിച്ചു എങ്കിലും കൊറിയൻ ഗോൾ വേഗത്തിൽ വന്നില്ല. അവസാനം 90ആം മിനിറ്റിൽ ഒരു സെൽഫ് ഗോളിലൂടെ കൊറിയ അവരുടെ സമനില കണ്ടെത്തി. തുടർന്ന് കളി 2-2 എന്ന സമനിലയിൽ അവസാനിച്ചു. ഇപ്പോൾ ഗ്രൂപ്പിൽ ജോർദാൻ നാലു പോയിന്റുമായി ഒന്നാമതും കൊറിയ നാലു പോയിന്റുമായി രണ്ടാം സ്ഥാനത്തും നിൽക്കുന്നു. ഗ്രൂപ്പിലെ ആദ്യ രണ്ട് സ്ഥാനക്കാരും മികച്ച നാല് മൂന്നാം സ്ഥാനക്കാരും പ്രീക്വാർട്ടറിലേക്ക് യോഗ്യത നേടും.
