കേരള ബ്ലാസ്റ്റേഴ്സും ബെംഗളൂരു എഫ് സിയും തമ്മിലുള്ള പോരാട്ടത്തിന്റെ വിവാദങ്ങൾ അടങ്ങുന്നില്ല.മത്സരത്തിൽ വിവാദ ഗോൾ സ്കോർ ചെയ്ത ഇന്ത്യൻ ക്യാപ്റ്റൻ സുനിൽ ഛേത്രി വലിയ സൈബർ ആക്രമണം തന്നെ സാമൂഹിക മാധ്യമങ്ങളിൽ നേരിടുകയാണ്. സുനിൽ ചേത്രിയുടെ സോഷ്യൽ മീഡിയ അക്കൗണ്ടുകളിൽ ബ്ലാസ്റ്റേഴ്സ് ആരാധകരിൽ ചിലർ അവരുടെ രോഷം തീർക്കുകയാണ്. ചിലരുടെ രോഷ പ്രകടനങ്ങൾ അതിരുവിടുകയും ചെയ്യുന്നു.
ഇന്ത്യൻ ക്യാപ്റ്റന് എതിരെ വംശീയാധിക്ഷേപം വരെ നടക്കുകയാണ്. പല കായിക പേജുകളിലും സുനിൽ ഛേത്രിക്ക് എതിരെ വംശീയ ആക്രമണം നടക്കുന്നുണ്ട്. ഛേത്രിയുടെ ഭാര്യയുടെ ഇൻസ്റ്റഗ്രാം പേജിലും സൈബർ ആക്രമണം നടക്കുന്നുണ്ട്. ഛേത്രിയുടെ മരണം ആശംസിച്ചു കൊണ്ടുള്ള കമന്റുകൾ അദ്ദേഹത്തിന്റെ ഭാര്യയുടെ പേജിൽ കാണാം.
ഛേത്രിക്ക് എതിരെയുള്ള വിമർശനങ്ങൾ അദ്ദേഹത്തിനെതിരായ വ്യക്തിപരമായ ആക്രമണങ്ങളായി മാറുന്നത് കേരള ബ്ലാസ്റ്റേഴ്സ് ക്ലബോ ആരാധകരിൽ ബഹുഭൂരിപക്ഷമോ ആഗ്രഹിക്കുന്ന കാര്യമാകില്ല.
