ഐ എസ് എൽ പ്ലേ ഓഫിലെ ആദ്യ മത്സരം വിവാദ ഗോളിൽ ജയിച്ചു കൊണ്ട് ബെംഗളൂരു എഫ് സി സെമി ഫൈനലിൽ. കേരള ബ്ലാസ്റ്റേഴ്സ് കളി പൂർത്തിയാക്കാതെ കളം വിട്ടിരുന്നു. തിരിച്ച് ഗ്രൗണ്ടിലേക്ക് വരാതിരുന്നതോടെയാണ് ബെംഗളൂരുവിനെ വിജയികളായി പ്രഖ്യാപിച്ചത്. കളി എക്സ്ട്രാ ടൈമിൽ 0-0 എന്ന് നിൽക്കുമ്പോൾ ആയിരുന്നു വിവാദ ഗോൾ വന്നത്.
കേരള ബ്ലാസ്റ്റേഴ്സ് ഒരു ഫ്രീകിക്ക് ഡിഫൻഡ് ചെയ്യാൻ ഒരുങ്ങും മുമ്പ് സുനിൽ ഛേത്രി ബെംഗളൂരുവിനായി ഗോൾ അടിച്ചത് ആണ് വിവാദമായത്. ഈ ഗോൾ അംഗീകരിക്കാൻ ആവാത്തത് കൊണ്ട് കേരള ബ്ലാസ്റ്റേഴ്സ് കളം വിടുക ആയിരുന്നു. ഇതോടെ മാച്ച് കമ്മീഷണർ മത്സരത്തിൽ ബെംഗളൂരു എഫ് സിയെ വിജയികളായി പ്രഖ്യാപിച്ചു.
ഇന്ന് ആദ്യ 90 മിനുട്ടിലും ഗോൾ പിറന്നിരുന്നില്ല. തുടർന്ന് എക്സ്ട്രാ ടൈമിൽ എത്തിയപ്പോൾ ആണ് കളി വിവാദത്തിൽ അവസാനിച്ചത്. എക്സ്ട്രാ ടൈമിന്റെ ആറാം മിനുട്ടിൽ ബെംഗളൂരുവിന് കിട്ടിയ ഫ്രീകിക്ക് സുനിൽ ഛേത്രി ലക്ഷ്യത്തിൽ എത്തിച്ചു. കേരള ബ്ലാസ്റ്റേഴ്സ് ഫ്രീകിക്ക് ഡിഫൻഡ് ചെയ്യാൻ തയ്യാറാകുന്നതിന് ഇടയിൽ സുനിൽ ഛേത്രി കിക്ക് എടുക്കുകയും ഗോൾ ആക്കുകയും ചെയ്തു. ഇതാണ് വിവാദമായത്. ഈ ഗോൾ അംഗീകരിക്കാൻ ആകില്ല എന്നു കേരള ബ്ലാസ്റ്റേഴ്സ് താരങ്ങളും പരിശീലകനും തീരുമാനിച്ചു. ഇവാൻ വുകമാനോവിച് താരങ്ങളോട് കളം വിടാൻ പറയുകയും ടീം കളം വിടുകയും ചെയ്തു. റഫറിയുടെ തെറ്റിനാണ് ബ്ലാസ്റ്റേഴ്സ് ഇത്ര വലിയ വില കൊടുക്കേണ്ടി വന്നത്.
ഐ എസ് എൽ ചരിത്രത്തിൽ ആദ്യമായാ‌ണ് ഒരു ടീം കളി പൂർത്തിയാക്കാതെ പുറത്ത് പോകുന്നത്. ഈ തീരുമാനത്തിൽ ബ്ലാസ്റ്റേഴ്സിനെതിരെ കടുത്ത നടപടി ഉണ്ടാകാനും സാധ്യതയുണ്ട്. ബെംഗളൂരു ഇനി സെമിയിൽ മുംബൈ സിറ്റിയെ നേരിടും.
