ഐ എസ് എല്ലിൽ ഇന്ന് ജീവന്മമരണ പോരാട്ടം തന്നെയാണ് നടക്കുന്നത്. ഇന്ന് ഒരു വിജയം കൊണ്ട് പ്ലേ ഓഫ് ഉറപ്പിക്കാൻ മുംബൈ സിറ്റിക്കും ചെന്നൈയിൻ എഫ് സിക്കും ആകും. മുംബൈയുടെ ഹോം ഗ്രൗണ്ടായ മുംബൈ ഫുട്ബോൾ അരീനയുൽ വെച്ചാണ് ചെന്നൈയിനും മുംബൈ സിറ്റിയും ഇന്ന് കൊമൊ കോർക്കുന്നത്. മുംബൈ സിറ്റിക്ക് 17 മത്സരങ്ങളിൽ 26 പോയന്റും, ചെന്നൈയിന് 16 മത്സരങ്ങളിൽ നിന്ന് 25 പോയന്റുമാണ് ഉള്ളത്.
ഇന്ന് വിജയിക്കുന്നവർക്ക് പ്ലേ ഓഫിലെ അവസാന സ്ഥാനം സ്വന്തമാക്കാൻ ആകും. ഇന്ന് സമനില ആവുകയാണെങ്കിൽ ചെന്നൈയിന്റെ അവസാന മത്സരമാകും ആര് സെമിയിൽ എത്തും എന്ന് തീരുമാനിക്കുക. അവസാന മത്സരത്തിൽ ഗോവയോട് പരാജയപ്പെട്ട മുംബൈ ഇന്ന് ഹോം ഗ്രൗണ്ടാണ് എന്നത് ഊർജ്ജം നൽകും. ഹോം ഗ്രൗണ്ടിൽ മികച്ച റെക്കോർഡ് ആണ് മുംബൈ സിറ്റിക്ക് ഉള്ളത്.
മറുവശത്തുള്ള ചെന്നൈയിൻ മികച്ച ഫോമിലാണ്. അവസാന ആറു മത്സരങ്ങളിൽ ചെന്നൈയിൻ പരാജയം അറിഞ്ഞിട്ടില്ല. മാത്രമല്ല അവസാന മൂന്ന് എവേ മത്സരങ്ങളും വിജയിക്കാനും ചെന്നൈയിനായിരുന്നു.
