ഫ്രഞ്ച് താരം പോൾ പോഗ്ബയുടെ സഹോദരൻ ആയ ഫ്ലൊറെന്റിൻ പോഗ്ബയെ ഇനി ഐ എസ് എല്ലിൽ ഇല്ല. മോഹൻ ബഗാൻ താരത്തിന്റെ കരാർ റദ്ദാക്കിയതായി IFTWC റിപ്പോർട്ട് ചെയ്യുന്നു. ഡിഫൻഡറായ ഫ്ലൊറെന്റിൻ പോഗ്ബയ്ക്ക് ഇന്ത്യയിൽ അത്ര നല്ല കാലമായിരുന്നില്ല. കഴിഞ്ഞ സീസണിൽ ബഗാന് കാര്യമായി സംഭാവന ചെയ്യാൻ പോഗ്ബക്ക് ആയിരുന്നില്ല. ഇനിയും കരാർ ബാക്കിയിരിക്കെ ആണ് ക്ലബ് താരത്തെ പറഞ്ഞു വിടുന്നത്.
ഫ്രഞ്ച് രണ്ടാം ഡിവിഷനിൽ നിന്ന് ആയിരുന്നു പോഗ്ബ ഇന്ത്യയിൽ എത്തിയത്. 32കാരനായ ഫ്ലൊറെന്റിൻ പോഗ്ബ മുൻ മാഞ്ചസ്റ്റർ യുണൈറ്റഡ് താരം പോഗ്ബയുടെ മൂത്ത സഹോദരനാണ്. അതുകൊണ്ട് തന്നെ പോഗ്ബയുടെ സൈനിംഗ് അന്ന് വലിയ വാർത്ത ആയിരുന്നു.
മുമ്പ് എം എൽ എസ് ക്ലബായ അറ്റ്ലാന്റ യുണൈറ്റഡിനായി കളിച്ചിട്ടുണ്ട്. ആറ് വർഷത്തോളം ഫ്രഞ്ച് ലീഗ് ക്ലബായ സൈന്റ് എറ്റിയന് ഒപ്പവും ഏട്ടൻ പോഗ്ബ ഉണ്ടായിരുന്നു. ഫ്രാൻസിന്റെ യുവടീമുകൾക്ക് കളിച്ചിട്ടുണ്ട് എങ്കിലും സീനിയർ ടീമിന് കളിക്കാനായി ഗിനിയ ദേശീയ ടീം ആണ് ഫ്ലൊറെന്റിൻ തിരഞ്ഞെടുത്തത്‌. ഗിനിയക്കായി പക്ഷെ കുറച്ച് മത്സരങ്ങൾ മാത്രമെ അദ്ദേഹം കളിച്ചിട്ടുള്ളൂ.
