വെള്ളിയാഴ്ച ഗോവയിലെ ഫത്തോർഡയിലെ പണ്ഡിറ്റ് ജവഹർലാൽ നെഹ്‌റു സ്റ്റേഡിയത്തിൽ നടക്കുന്ന മത്സരത്തിൽ നോർത്ത് ഈസ്റ്റ് യുണൈറ്റഡ് എഫ്‌സി ഈസ്റ്റ് ബംഗാളിനെ നേരിടും. ഈ സീസണിൽ ഇരുടീമുകളും മികച്ച പ്രകടനം പുറത്തെടുത്തിട്ടില്ലാത്തതിനാൽ മൂന്ന് പോയിന്റുകൾ തന്നെയാണ് ക്ലബുകൾ ലക്ഷ്യമിടുന്നത്. നോർത്ത് ഈസ്റ്റ് യുണൈറ്റഡ് എഫ്‌സി കഴിഞ്ഞ മത്സരത്തിൽ ഹൈദരാബാദ് എഫ്‌സിക്കെതിരെ തോറ്റപ്പോൾ, ഈസ്റ്റ് ബംഗാളിന് കേരള ബ്ലാസ്റ്റേഴ്‌സിനെതിരെ സമനില വഴങ്ങിയാണെത്തുന്നത്.
ഖാലിദ് ജാമിലിന്റെ നോർത്ത് ഈസ്റ്റിന് ഈ സീസൺ വളരെ മോശം തുടക്കമാണ് ലഭിച്ചിരിക്കുന്നത്, നിലവിൽ
നാല് പോയിന്റുമായി ലീഗ് പട്ടികയിൽ പത്താം സ്ഥാനത്താണ്. ആറ് മത്സരങ്ങളിൽ ഒന്ന് ജയിക്കുകയും ഒരു സമനിലയും നാലിൽ തോൽക്കുകയും ചെയ്തവരാണ് ഹൈലാൻഡേഴ്സ്.
ഈ സീസണിൽ ഒരു മത്സരം പോലും ജയിക്കാത്ത ഏക ടീമായ ഈസ്റ്റ് ബംഗാൾ മൂന്ന് പോയിന്റുമായി ലീഗ് ടേബിളിൽ അവസാന സ്ഥാനത്താണ്. ആറ് കളികളിൽ നിന്ന് മൂന്ന് സമനിലകളും മൂന്ന് തോൽവികളുമാണ് ഈസ്റ്റ് ബംഗാളിന്റെ സമ്പാദ്യം.
