Category: Internationals

ആഴ്‌സണലിന്റെ യുവ താരം എമിൽ സ്മിത് റോ കരിയറിൽ ആദ്യമായി ഇംഗ്ലീഷ് സീനിയർ ടീമിൽ ഇടം പിടിച്ചു. ഇംഗ്ലണ്ട് യൂത്ത് ടീനുകളുടെ സ്ഥിരസാന്നിധ്യമായ സ്മിത് റോക്ക് ഇത് അർഹിച്ച അംഗീകാരം ആണ്. ആഴ്‌സണലിന് ആയി സീസണിൽ മിന്നും ഫോമിലാണ് 21 കാരനായ താരം. സീസണിൽ ഇത് വരെ 5 ഗോളുകളും 2 അസിസ്റ്റുകളും ആണ് ലീഗിൽ മാത്രം സ്മിത് റോ നേടിയത്. കഴിഞ്ഞ 3 പ്രീമിയർ ലീഗ്‌ മത്സരങ്ങളിൽ തുടർച്ചയായി ഗോളുകൾ നേടാനും താരത്തിന് ആയി.

ശാരീരിക ക്ഷമത പൂർണമായും കൈവരിക്കാത്ത മാഞ്ചസ്റ്റർ യുണൈറ്റഡ് താരം മാർക്കോസ് റാഷ്ഫോർഡ്, ചെൽസിയുടെ മേസൻ മൗണ്ട്, മാഞ്ചസ്റ്റർ യുണൈറ്റഡിന്റെ ലൂക് ഷാ, അസുഖം കാരണം സൗതാപ്റ്റണിന്റെ ജെയിംസ് വാർഡ് പ്രോസ് എന്നിവർ ഇംഗ്ലീഷ് ടീമിൽ നിന്നു പിന്മാറിയിട്ടുണ്ട്. നേരത്തെ സ്മിത് റോ അടക്കമുള്ള താരങ്ങൾക്ക് ഇംഗ്ലീഷ് ടീമിൽ ഇടം ലഭിക്കാത്തതിൽ ഇയാൻ റൈറ്റ് അടക്കമുള്ള പ്രമുഖർ വിമർശനം ഉന്നയിച്ചിരുന്നു. ലോകകപ്പ് യോഗ്യത മത്സരങ്ങളിൽ അൽബാനിയ, സാൻ മറീനോ ടീമുകളെ ആണ് ഇംഗ്ലണ്ട് വരും മത്സരങ്ങളിൽ നേരിടുക.

ഖത്തറിനെതിരായ സൗഹൃദ മത്സരത്തിൽ മികച്ച ജയവുമായി പോർച്ചുഗൽ. ഏകപക്ഷീയമായ മൂന്ന് ഗോളുകൾക്കാണ് പോർച്ചുഗൽ ലോകകപ്പിന്റെ ആതിഥേയരായ ഖത്തറിനെ പരാജയപ്പെടുത്തിയത്. ക്രിസ്റ്റ്യാനോ റൊണാൾഡോ, ജോസെ ഫോണ്ടേ, ആന്ദ്രെ സിൽവ എന്നിവരാണ് പോർച്ചുഗല്ലിനായി ഗോളടിച്ചത്.

സൂപ്പർ താരം ക്രിസ്റ്റ്യാനോ റൊണാൾഡോ തന്റെ കരിയറിലെ 112ആം ഗോളാണ് ഇന്ന് അടിച്ചത്. ക്രിസ്റ്റ്യാനോ റൊണാൾഡോ ഗോളടിക്കുന്ന 46മത്തെ രാജ്യം കൂടിയാണ് ഖത്തർ. ഏറ്റവുമധികം ഗോളടിച്ച റെക്കോർഡും ഏറ്റവുമധികം രാജ്യങ്ങൾക്കെതിരെ ഗോളടിച്ച റെക്കോർഡും ഇപ്പോൾ ക്രിസ്റ്റ്യാനോയുടെ പേരിലാണ്. തന്റെ കരിയറിലെ 791മത്തെ ഗോളാണ് ഇന്ന് ക്രിസ്റ്റ്യാനോ അടിച്ചത്.

ലോകകപ്പ് യോഗ്യത മത്സരത്തിൽ വമ്പൻ ജയവുമായി അസൂറികൾ. എതിരില്ലാത്ത അഞ്ച് ഗോളുകൾക്കാണ് ഇറ്റാലിയൻ ടീം ലിത്വാനിയയെ പരാജയപ്പെടുത്തിയത്. ഈ ജയത്തോടുകൂടി അപരാജിതക്കുതിപ്പ് തുടരുകയാണ് ഇറ്റലി. ഇറ്റലിക്ക് വേണ്ടി മോയിസെ കീൻ ഇരട്ട ഗോളുകൾ നേടിയപ്പോൾ ജിയകോമോ റാസ്പടോരി ഒരു ഗോളടിക്കുകയും മറ്റൊരു ഗോളിന് വഴിയൊരുക്കുകയും ചെയ്തു. ഡി ലോറെൻസോയുടെ ഗോളിൽ ഇറ്റലി രണ്ടാം പകുതിയുടെ തുടക്കത്തിൽ തന്നെ അഞ്ചാം ഗോൾ നേടുകയും ചെയ്തു.

റാസ്പടൊരിയുടെ വൈട് ബോൾ എഡ്ഗരാസ് ഉത്കസിന്റെ ഡിഫ്ലെക്ഷനിൽ സെൽഫ് ഗോളായി ലിത്വാനിയയുടെ വലയിൽ കയറി. ആദ്യ പതിനൊന്നാം മിനുട്ടിൽ തന്നെ മോയിസെ കീനിലൂടെ ഇറ്റലി ഗോളടിയാരംഭിച്ചു. കളിയുടെ അരമണിക്കൂറിൽ തന്നെ ഇരട്ട ഗോളുകൾ പൂർത്തിയാക്കാൻ മോയിസെ കീനിനായി. തുടർച്ചയായ സമനിലകൾക്ക് ശേഷമുള്ള വലിയ ജയം ഇറ്റലിക്ക് തുണയാകും. പരിക്കേറ്റ താരങ്ങളുടെ വലിയ നിരയുമായി കഷ്ടപ്പെടുന്ന മാൻചിനിക്കും സംഘത്തിനും ആശ്വാസമാണ് ഈ ജയം. ഗ്രൂപ്പ് സിയിലെ‌ മറ്റൊരു മത്സരത്തിൽ നോർത്തേൺ അയർലാന്റ് സ്വിറ്റ്സർലാന്റിനെ സമനിലയിൽ കുരുക്കി.

ലോകകപ്പ് യോഗ്യത മത്സരങ്ങളിലെ ഇംഗ്ലണ്ടിന്റെ വിജയക്കുതിപ്പിന് തടയിട്ട് പോളണ്ട്. ഇഞ്ചുറി ടൈമിൽ സമനില നേടിയാണ് ഇംഗ്ലണ്ടിനെ പോളണ്ട് ഞെട്ടിച്ചത്. ഇരു ടീമുകളും ഓരോ ഗോൾ വീതമടിച്ച് പോയന്റ് പങ്കിട്ട് പിരിഞ്ഞപ്പോൾ ഇംഗ്ലണ്ടിന് വേണ്ടി ഹാരി കെയ്നും പോളണ്ടിന് വേണ്ടി ഡാമിയൻ സൈമൻസ്കിയും ഗോളടിച്ചു. വാർസോയിലെ കലുഷിതമായ മത്സരത്തിൽ ആദ്യ‌ പകുതിയിൽ കയ്യാങ്കളിയുണ്ടായെങ്കിലും ഗോൾ പിറന്നില്ല.

പോളിഷ് സൂപ്പർ സ്ട്രൈക്കർ ലെവൻഡോസ്കിക്ക് ആകെ ലഭിച്ച അവസരവും പിക്ഫോർഡ് വിഫലമാക്കി. ആദ്യം ഗോളടിച്ചത് 72ആം മിനുട്ടിൽ ഹാരി കെയ്നാണ്. ഇംഗ്ലണ്ട് കളി ജയിച്ചെന്നുറപ്പിച്ചപ്പോൾ 92ആം മിനുട്ടിലെ റോബർട്ട് ലെവൻഡോസ്കിയുടെ ഹെഡ്ഡ് ചെയ്താണ് ഡാമിയൻ പോളണ്ടിന് സ്വന്തം കാണികൾക്ക് മുന്നിൽ സമനില നേടിക്കൊടുത്തത്. ഗ്രൂപ്പ് ഐയിൽ ആദ്യ അഞ്ച് മത്സരവും ജയിച്ച ഇംഗ്ലണ്ട് 16പോയന്റുമായി ഒന്നാമതാണ്. 12 പോയന്റുമായി അൽബേനിയ രണ്ടാമതും 11 പോയന്റുമായി പോളണ്ട് മൂന്നാമതും 10 പോയന്റുമായി ഹങ്കറിയുമാണുള്ളത്. ഗ്രൂപ്പ് ജേതാക്കൾ ലോകകപ്പ് യോഗ്യത ഡയറക്ട് നേടുകയും രണ്ടാം സ്ഥാനക്കാർ പ്ലേ ഓഫിലേക്ക് കടക്കുകയും ചെയ്യും.

ഹാൻസി ഫ്ലിക്ക് യുഗത്തിൽ വിജയക്കുതിപ്പ് തുടർന്ന് ജർമ്മനി. ഗ്രൂപ്പ് ജെയിലെ മത്സരത്തിൽ എതിരില്ലാത്ത നാല് ഗോളുകൾക്കാണ് ജർമ്മനി ഐസ്ലാന്റിനെ പരാജയപ്പെടുത്തിയത്‌. സെർജ് ഗ്നാബ്രി, റൂഡിഗർ,സാനെ, തീമോ വെർണർ എന്നിവരാണ് ജർമ്മനിക്ക് വേണ്ടി ഗോളടിച്ചത്. ഒരു ഗോളടിക്കുകയും മറ്റൊന്നിന് വഴിയൊരുക്കുകയും ചെയ്ത് ബയേണിന്റെ വിംഗർ ലെറോയ് സാനെ കളിയുടെ ചുക്കാൻ പിടിച്ചു.

ഹാൻസി ഫ്ലിക്കിന്റെ കീഴിൽ ജർമ്മൻ മികച്ച പ്രകടനമാണ് പുറത്തെടുക്കുന്നത്. ഫ്ലിക്കിന്റെ കീഴിൽ 12 ഗോളുകൾ അടിച്ച് കൂട്ടിയ ജർമ്മനി ഒരു ഗോൾ പോലും ഇതുവരെ വഴങ്ങിയിട്ടില്ല. അതേ സമയം തുടർച്ചയായി ഗോളടിക്കാൻ ലഭിച്ച അവസരങ്ങൾ ജർമ്മൻ താരങ്ങൾ നഷ്ടപ്പെടുത്തിയിരുന്നു. തീമോ വെർണർ ഇന്നും ഒരു സുവർണ്ണാവസരം നഷ്ടപ്പെടുത്തുകയും ചെയ്തു. ഗ്രൂപ്പിൽ 15 പോയന്റുകളുമായി ജർമ്മനി ഒന്നാമതാണ്.

യൂറോപ്യൻ ലോകകപ്പ് യോഗ്യത മത്സരത്തിൽ വമ്പൻ ജയവുമായി സ്‌പെയിൻ. ദുർബലരായ ജോർജിയയെ എതിരില്ലാത്ത 4 ഗോളുകൾക്ക് ആണ് സ്പാനിഷ് ടീം ഇന്ന് തകർത്തത്. 14 മിനിറ്റിൽ കോർണറിൽ നിന്നു ഗോൾ കണ്ടത്തിയ ജോസെ ഗയയാണ് സ്പെയിനിന്റെ ആദ്യ ഗോൾ നേടിയത്. 25 മിനിറ്റിൽ കാർലോസ് സോളർ റീബൗണ്ട് അവസരം ലക്ഷ്യം കണ്ടു സ്പാനിഷ് ഗോൾ നേട്ടം രണ്ടാക്കി ഉയർത്തി. 41 മിനിറ്റിൽ ഗോൾ കണ്ടത്തിയ ഫെരാൻ ടോറസ് ആദ്യ പകുതിയിൽ തന്നെ സ്പാനിഷ് ജയം ഉറപ്പിച്ചു. 63 മിനിറ്റിൽ പാബ്ലോ ഫോർനാൽസിന്റെ പാസിൽ നിന്നു ഗോൾ കണ്ടത്തിയ പാബ്ലോ സറാബിയ ആണ് സ്പാനിഷ് ജയം പൂർത്തിയാക്കിയത്. മത്സരത്തിൽ 75 ശതമാനം സമയവും പന്ത് കൈവശം വച്ച സ്പെയിൻ നിരവധി അവസരങ്ങൾ ആണ് സൃഷ്ടിച്ചത്.

മറ്റൊരു ദുർബലരായ അർമേനിയയെ ഗോൾ മഴയിൽ മുക്കിയാണ് ജർമ്മനി തങ്ങളുടെ ജയം ആഘോഷിച്ചത്. സെർജ് ഗനാബ്രി ഇരട്ടഗോളുകൾ നേടിയ മത്സരത്തിൽ എതിരില്ലാത്ത 6 ഗോളുകൾക്ക് ആയിരുന്നു ജർമ്മൻ ജയം. മത്സരം തുടങ്ങി ആറാം മിനിറ്റിൽ തന്നെ തന്റെ ബയേൺ സഹതാരം ഗോർട്ടസ്കെയുടെ പാസിൽ നിന്നു ഗനാബ്രി ഹൻസി ഫ്ലിക്കിന്റെ ടീമിന് മുൻതൂക്കം നൽകി. 15 മിനിറ്റിൽ മാർകോ റൂയിസിന്റെ പാസിൽ നിന്നു തന്റെ രണ്ടാം ഗോൾ കണ്ടത്തിയ ഗനാബ്രി ജർമ്മൻ ലീഡ് ഉയർത്തി. 35 മിനിറ്റിൽ തിമോ വെർണറിന്റെ പാസിൽ നിന്നു മാർകോ റൂയിസ് മൂന്നാം ഗോൾ കണ്ടത്തി. 44 മിനിറ്റിൽ ഇത്തവണ ഗോർട്ടസ്‌കെയുടെ പാസിൽ നിന്നു ഗോൾ നേടിയ വെർണർ ജർമ്മൻ ഗോൾ നേട്ടം നാലാക്കി ഉയർത്തി. രണ്ടാം പകുതിയിൽ 52 മിനിറ്റിൽ യൊനാസ് ഹോഫ്മാൻ ജർമ്മനിക്ക് അഞ്ചാം ഗോൾ സമ്മാനിച്ചപ്പോൾ 91 മിനിറ്റിൽ റിറ്റ്സിന്റെ പാസിൽ നിന്നു കരിം അദിയെമിയാണ് ജർമ്മൻ ജയം പൂർത്തിയാക്കിയത്.