Category: Internationals

ലോകകപ്പ് യോഗ്യത നേടാൻ ആവാത്ത ടീമുകൾ തമ്മിലുള്ള സൗഹൃദ മത്സര പോരാട്ടത്തിൽ തുർക്കിയെ രണ്ടിനെതിരെ മൂന്നു ഗോളുകൾക്ക് തോൽപ്പിച്ചു ഇറ്റലി. ഇരു ടീമുകളും തങ്ങളുടെ യുവ താരങ്ങളെ അണിനിരത്തിയ മത്സരം ത്രില്ലർ തന്നെ ആയിരുന്നു. മത്സരത്തിൽ നാലാം മിനിറ്റിൽ ഉനാലിന്റെ പാസിൽ നിന്നു ഗോൾ നേടിയ ചെങ്കിസ് ഉണ്ടർ തുർക്കിയെ മത്സരത്തിൽ മുന്നിലെത്തിച്ചു. എന്നാൽ 35 മത്തെ മിനിറ്റിൽ ക്രിസ്റ്റിയാനോ ബിറാഗിയുടെ പാസിൽ നിന്നു ബ്രയാൻ ക്രിസ്റ്റാന്റെ അസൂറി പടയെ മത്സരത്തിൽ ഒപ്പമെത്തിച്ചു.

തുടർന്ന് നാലു മിനിറ്റിനു അകം യുവ താരം സാൻഡ്രോ ടോണാലിയുടെ പാസിൽ നിന്നു മറ്റൊരു യുവതാരം ജിയകോമോ റാസ്‌പഡോറി ഇറ്റലിയെ മുന്നിലെത്തിച്ചു. രണ്ടാം പകുതിയിൽ ക്രിസ്റ്റിയാനോ ബിറാഗിയുടെ പാസിൽ നിന്നു തന്റെ രണ്ടാം ഗോളും കണ്ടത്തിയ റാസ്‌പഡോറി മത്സരത്തിൽ മിന്നും പ്രകടനം ആണ് പുറത്ത് എടുത്തത്. മാസിഡോണിയക്ക് എതിരെ ഗോൾ അടിക്കാൻ മറന്ന ഇറ്റലിക്ക് ആയി ഇവിടെ റാസ്‌പഡോറി ഗോളുകൾ കണ്ടത്തി. 83 മത്തെ മിനിറ്റിൽ സൊയുച്ചുവിന്റെ പാസിൽ നിന്നു സെർദർ ദുർസൻ ഒരു ഗോൾ മടക്കിയെങ്കിലും തുർക്കിക്ക് എതിരെ ഇറ്റലി ആശ്വാസ ജയം നേടിയെടുക്കുക ആയിരുന്നു.

അന്താരാഷ്ട്ര സൗഹൃദ മത്സരത്തിൽ ബുർകിനോ ഫാസോയെ എതിരില്ലാത്ത 3 ഗോളുകൾക്ക് തോൽപ്പിച്ചു ബെൽജിയം. ബെൽജിയം ആധിപത്യം കണ്ട മത്സരത്തിൽ ഇടക്ക് ആഫ്രിക്കൻ ടീം അവരെ പരീക്ഷിച്ചു എങ്കിലും വലിയ വെല്ലുവിളി ഒന്നും റോബർട്ടോ മാർട്ടിനസിന്റെ ടീം നേരിട്ടില്ല. ബ്രൈറ്റൻ താരം ലിയാൻഡ്രോ ട്രോസാർഡിന്റെ മിന്നും പ്രകടനം ആണ് അവർക്ക് മികച്ച ജയം സമ്മാനിച്ചത്.

മത്സരത്തിൽ 16 മത്തെ മിനിറ്റിൽ ട്രോസാർഡിന്റെ ക്രോസിൽ നിന്നു ഹെഡറിലൂടെ ഹാൻസ് വനകൻ ബെൽജിയത്തെ മുന്നിൽ എത്തിച്ചു. രണ്ടു മിനിട്ടുകൾക്ക് അകം തന്റെ ഗോളും ട്രോസാർഡ് കണ്ടത്തി. തുടർന്ന് രണ്ടാം പകുതിയിൽ ട്രോസാർഡിന്റെ കോർണറിൽ നിന്നു ഹെഡറിലൂടെ പകരക്കാനായി ഇറങ്ങിയ ക്രിസ്റ്റിയൻ ബെന്റക്കെ ബെൽജിയം ജയം പൂർത്തിയാക്കുക ആയിരുന്നു.

അന്താരാഷ്ട്ര സൗഹൃദ മത്സരത്തിൽ എതിരില്ലാത്ത 5 ഗോളുകൾക്ക് ദക്ഷിണാഫ്രിക്കയെ തോൽപ്പിച്ചു ഫ്രാൻസ്. ദക്ഷിണാഫ്രിക്കക്ക് എതിരെ ആധികാരിക പ്രകടനം ആണ് ലോക ചാമ്പ്യന്മാർ പുറത്ത് എടുത്തത്. ആദ്യ പകുതിയിൽ 23 മത്തെ മിനിറ്റിൽ കിലിയൻ എമ്പപ്പെയും 33 മത്തെ മിനിറ്റിൽ ഒലിവർ ജിറോഡും ഫ്രാൻസിന് ആയി ഗോളുകൾ കണ്ടത്തി. ഇരു ഗോളിനും അന്റോൺ ഗ്രീസ്മാൻ ആയിരുന്നു വഴി ഒരുക്കിയത്.

രണ്ടാം പകുതിയിൽ 76 മത്തെ മിനിറ്റിൽ പെനാൽട്ടി ഗോൾ ആക്കി തന്റെ രണ്ടാം ഗോൾ നേടിയ എമ്പപ്പെ വലിയ ജയം ഉറപ്പിച്ചു. തുടർന്ന് 81 മത്തെ മിനിറ്റിൽ പോൾ പോഗ്ബയുടെ പാസിൽ നിന്നു ഗോൾ നേടിയ ബെൻ യെഡർ ഫ്രാൻസിന് നാലാം ഗോളും സമ്മാനിച്ചു. തുടർന്ന് കൂലിസോക്ക് ചുവപ്പ് കാർഡ് കണ്ടതോടെ ദക്ഷിണാഫ്രിക്ക 10 പേരായി ചുരുങ്ങി. ഇഞ്ച്വറി സമയത്ത് 92 മത്തെ മിനിറ്റിൽ ഗോൾ നേടിയ മുൻ ആഴ്‌സണൽ താരം മറ്റെയോ ഗുണ്ടോസിയാണ് ഫ്രാൻസ് ജയം പൂർത്തിയാക്കിയത്. എമ്പപ്പെയുടെ പാസിൽ നിന്നായിരുന്നു ഗുണ്ടോസിയുടെ ഗോൾ പിറന്നത്.

അന്താരാഷ്ട്ര സൗഹൃദ മത്സരത്തിൽ ഐസ്ലാന്റിനെ എതിരില്ലാത്ത 5 ഗോളുകൾക്ക് തകർത്തു സ്‌പെയിൻ. മത്സരത്തിൽ ഏതാണ്ട് 85 ശതമാനം സമയവും പന്ത് കൈവശം വച്ച സ്പാനിഷ് ടീം എതിരാളിക്ക് പന്ത് നൽകിയില്ല എന്നു പറഞ്ഞാലും അതിശയം ആവില്ല. മത്സരത്തിൽ 36 മത്തെ മിനിറ്റിൽ അൽവാരോ മൊറാറ്റയാണ് സ്‌പെയിനിന്റെ ആദ്യ ഗോൾ നേടിയത്. തുടർന്ന് മൂന്നു മിനിറ്റുകൾക്കു അകം ഡാനി ഓൽമോയെ വീഴ്ത്തിയതിനു ലഭിച്ച പെനാൽട്ടി ലക്ഷ്യം കണ്ട മൊറാറ്റ സ്പാനിഷ് മുൻതൂക്കം ഇരട്ടിയാക്കി. ഇരട്ട ഗോൾ ഗോൾ നേടിയതോടെ സ്‌പെയിനിന് ആയി ഏറ്റവും കൂടുതൽ ഗോൾ നേടുന്ന എട്ടാമത്തെ താരമായി യുവന്റസ് താരം.

തുടർന്ന് രണ്ടാം പകുതിയുടെ തുടക്കത്തിൽ തന്നെ യെറമി പിനോ ഗോൾ നേടിയതോടെ സ്‌പെയിൻ വലിയ ജയം ഉറപ്പിച്ചു. താരത്തിന്റെ ആദ്യ അന്താരാഷ്ട്ര ഗോൾ ആയിരുന്നു ഇത്. തുടർന്ന് ഓൽമോക്ക് പകരക്കാനായി ഇറങ്ങിയ പാബ്ലോ സറാബിയയുടെ ഊഴം ആയിരുന്നു. 61, 72 മിനിറ്റുകളിൽ താരം ഗോൾ കണ്ടത്തി. ഇരു ഗോളുകൾക്കും മാർക്കോസ് അലോൺസോ ആയിരുന്നു അവസരം ഒരുക്കിയത്. മറ്റുള്ളവർക്ക് വലിയ വെല്ലുവിളി നൽകുന്ന പ്രകടനം തന്നെയാണ് ലൂയിസ് എൻറിക്വയുടെ ടീമിൽ നിന്നു ഉണ്ടായത്.

ഐവറി കോസ്റ്റിനെതിരായ സൗഹൃദ മത്സരത്തിൽ 3 ഗോൾ ജയവും ആയി ഇംഗ്ലണ്ട്. ചരിത്രത്തിൽ ഇത് ആദ്യമായാണ് ഇരു ടീമുകളും പരസ്പരം ഏറ്റുമുട്ടിയത്. കെയിനിന് പകരം ആസ്റ്റൻ വില്ലയുടെ ഒലി വാക്ൻസിനെ ആണ് ഇംഗ്ലണ്ട് ഇന്ന് കളത്തിൽ ഇറക്കിയത്. 30 മത്തെ മിനിറ്റിൽ റഹീം സ്റ്റർലിങിന്റെ പാസിൽ നിന്നു താരം മത്സരത്തിൽ ഇംഗ്ലണ്ടിനെ മുന്നിൽ എത്തിക്കുകയും ചെയ്തു. തുടർന്ന് 40 മത്തെ മിനിറ്റിൽ സെർജ് ഓറിയർ രണ്ടാം മഞ്ഞ കാർഡ് കണ്ടതോടെ ആഫ്രിക്കൻ ടീം 10 പേരായി ചുരുങ്ങി.

തുടർന്ന് ആദ്യ പകുതിക്ക് തൊട്ടു മുമ്പ് ഇംഗ്ലണ്ട് തങ്ങളുടെ മുൻതൂക്കം ഇരട്ടിയാക്കി. ഇത്തവണ ജാക് ഗ്രീലീഷിന്റെ പാസിൽ നിന്നു ഗോൾ കണ്ടത്തിയത് റഹീം സ്റ്റർലിങ് ആയിരുന്നു. ഇംഗ്ലീഷ് ആധിപത്യം കണ്ട മത്സരത്തിൽ അവസാന നിമിഷത്തിൽ ഇംഗ്ലണ്ട് ഒരു ഗോൾ കൂടി നേടി. ഇത്തവണ ഫിൽ ഫോഡന്റെ കോർണറിൽ നിന്നു ഗോൾ കണ്ടത്തിയത് പ്രതിരോധ താരം ടൈയിറോൺ മിങ്സ് ആയിരുന്നു. നിലവിൽ മികവ് തുടരുന്ന ഇംഗ്ലണ്ട് സമാന പ്രകടനം ഖത്തറിലും പുറത്ത് എടുക്കാൻ ആവും ശ്രമിക്കുക.

അന്താരാഷ്ട്ര സൗഹൃദ മത്സരത്തിൽ ഓരോ ഗോൾ വീതം അടിച്ചു സമനിലയിൽ പിരിഞ്ഞു ജർമ്മനിയും നെതർലാന്റ്സും. മത്സരത്തിൽ ജർമ്മൻ ആധിപത്യം ആണ് കാണാൻ ആയത്. ആദ്യ പകുതി തീരുന്നതിന് തൊട്ടു മുമ്പ് ഹോളണ്ട് പെനാൽട്ടി ബോക്‌സിൽ ലഭിച്ച അവസരം ലക്ഷ്യം കണ്ട തോമസ് മുള്ളർ ജർമ്മനിക്ക് മുൻതൂക്കം സമ്മാനിച്ചു.

രണ്ടാം പകുതിയിൽ 68 മത്തെ മിനിറ്റിൽ ഹോളണ്ട് മത്സരത്തിൽ സമനില കണ്ടത്തി. ഡി ജോങിന്റെ ക്രോസിൽ നിന്നു ഡംഫ്രയിസ് ഹെഡറിലൂടെ മറിച്ചു നൽകിയ പന്ത് ലക്ഷ്യം കണ്ട സ്റ്റീഫൻ ബെർഗയിൻ ആണ് ആതിഥേയർക്ക് സമനില ഗോൾ നൽകിയത്. ഇടക്ക് വാൻ ഗാലിന്റെ ഹോളണ്ടിനു പെനാൽട്ടി റഫറി അനുവദിച്ചു എങ്കിലും വാർ അത് നിരസിക്കുക ആയിരുന്നു.