ഐലീഗിൽ ഇന്ന് നടന്ന മത്സരത്തിൽ നെരോക എഫ് സിക്ക് വൻ വിജയം. ഇന്ന് തങ്ങളുടെ ഹോം ഗ്രൗണ്ടിൽ നടന്ന മത്സരത്തിൽ മികച്ച ഫോമിൽ ഉള്ള ട്രാവുവിനെ നേരിട്ട നെരോക മറുപടിയില്ലാത്ത അഞ്ചു ഗോളുകൾക്കാണ് വിജയിച്ചത്. മത്സരത്തിന്റെ തുടക്കത്തിൽ പിറന്ന ഒരു ചുവപ്പ് കാർഡാണ് നെരോകയ്ക്ക് മത്സരം ഇത്ര എളുപ്പമാക്കി കൊടുത്തത്. കളിയുടെ 18ആം മിനുട്ടിൽ ട്രാവുവിന്റെ സന്ദീപ് സിംഗാണ് ചുവപ്പ് വാങ്ങിയത്.
പിന്നീട് ഒരാളുടെ മുൻ തൂക്കത്തിൽ നെരോക ഗംഭീര പ്രകടനം തന്നെ നടത്തി. നെരോകയ്ക്ക് വേണ്ടി പ്രിതം സിങ് ഹാട്രിക്ക് നേടി. 60, 66, 91 മിനുട്ടുകളിൽ ആയിരുന്നു പ്രിതം സിംഗിന്റെ ഗോളുകൾ. ഇമ്രാൻ ഖാൻ, അഡ്ജ എന്നിവരും ഗോളുകൾ നേടി. ഈ വിജയം നേടിയിട്ടും നെരോക പത്താം സ്ഥാനത്ത് തന്നെയാണ് ഉള്ളത്. ട്രാവു മൂന്നാമത് നിൽക്കുകയാണ്.
