മലയാളി താരം ഫസലുറഹ്മാൻ വീണ്ടും വലകുലുക്കിയപ്പോൾ മുഹമ്മദൻസിന് ഐ ലീഗിൽ തുടർച്ചയായി രണ്ടാം വിജയം. ഇന്ന് നടന്ന മത്സരത്തിൽ എതിരില്ലാത്ത ഒരു ഗോളിന് ട്രാവു എഫ്സിയെ അവർ കീഴടക്കി. കഴിഞ്ഞ മത്സരത്തിലും താരം ഗോൾ കണ്ടെത്തിയിരുന്നു. വിജയത്തോടെ ട്രാവുവിനെ മറികടന്ന് ആറാമതെത്താനും മുഹമ്മദൻസിനായി.
കൊൽക്കത്തയിൽ ആദ്യ മിനിറ്റുകളിൽ ഇരു ടീമുകളും അവസരം തുറന്നെടുക്കാൻ മടിച്ചപ്പോൾ പന്ത് കൈവശം വെക്കുന്നതിൽ മുൻതൂക്കം ട്രാവുവിനായിരുന്നു. തുടക്കത്തിൽ ട്രാവുവിന്റെ പോകുവിനും ബികാശ് സിങിനും ലഭിച്ച ഹെഡർ അവസരങ്ങൾ ലക്ഷ്യത്തിൽ എത്താതെ പോയി. നാൽപതാം മിനിറ്റിൽ മുഹമ്മദൻസിന്റെ ഗോൾ എത്തി. അഭിഷേക് ബോക്സിലേക്ക് നൽകിയ ട്രാവു പ്രതിരോധത്തിൽ തട്ടി ഫസലുറഹ്മാൻ കാലുകളിൽ എത്തിയപ്പോൾ താരം യാതൊരു പിഴവും കൂടാതെ ലക്ഷ്യം കണ്ടു. രണ്ടാം പകുതിയിൽ മാർകസ് ജോസഫിന് ലീഡ് ഇരട്ടിയാക്കാനുള്ള അവസരം ലഭിച്ചെങ്കിലും ഷോട്ട് അകന്നു പോയി.
