ജർമ്മനിക്ക് തിരിച്ചടി, വെർണർ ലോകകപ്പിനില്ല !

ഖത്തർ ലോകകപ്പിനായൊരുങ്ങുന്ന ജർമ്മൻ ടീമിന് തിരിച്ചടി. സൂപ്പർ താരം തീമോ വെർണർ പരിക്ക് കാരണം ലോകകപ്പിൽ കളിക്കില്ല. ചാമ്പ്യൻസ് ലീഗിൽ ലെപ്സിഗിന് വേണ്ടി ശാക്തറിനെതിരെ കളിച്ച വെർണർക്ക് പരിക്കേറ്റിരുന്നു. ജർമ്മൻ ക്ലബ്ബായ ലെപ്സിഗ് വെർണർക്ക് ഇടം കാലിൽ പരിക്കാണെന്നും ഈ വർഷം മുഴുവനും പുറത്തിരിക്കേണ്ടി വരുമെന്നും അറിയിക്കുകയും ചെയ്തു.

ജർമ്മനിയെ സംബന്ധിച്ചിടത്തോളം സുപ്രധാന താരമാണ് തീമോ വെർണർ. ജർമ്മനിക്ക് വേണ്ടി കഴിഞ്ഞ എട്ടുകളികളിലും വെർണർ സ്റ്റാർട്ട് ചെയ്തിരുന്നു. ജർമ്മൻ ദേശീയ ടീമിനായി 55 മത്സരങ്ങളിൽ ബൂട്ടണിഞ്ഞ വെർണർ 24 ഗോളുകളും അടിച്ചിട്ടുണ്ട്‌. ജപ്പാനെതിരെ നവംബർ 23നാണ് ഹാൻസി ഫ്ലികിന്റെയും സംഘത്തിന്റെയും ആദ്യ മത്സരം.