യൂറോപ്പ ലീഗ് സെമി ഫൈനലിന്റെ ആദ്യ പാദത്തിൽ റോമക്ക് വിജയം. ഇന്ന് റോമിൽ വെച്ച് നടന്ന ആദ്യ പാദത്തിൽ ബയെർ ലെവർകൂസനെ നേരിട്ട ജോസെ മൗറീനോയുടെ ടീം മറുപടിയില്ലാത്ത ഏക ഗോളിനാണ് വിജയിച്ചത്. അധികം അവസരങ്ങൾ പിറക്കാതിരുന്ന മത്സരത്തിൽ 20കാരനായ എഡ്വാർഡോ ബോവെ ആണ് വിജയ ഗോൾ നേടിയത്.
പരിക്ക് കാരണം ഇന്ന് ഡിബാല റോമയുടെ ബെഞ്ചിൽ ആയിരുന്നു. അതുകൊണ്ട് തന്നെ അധികം അവസരങ്ങൾ സൃഷ്ടിക്കാൻ ജോസെയുടെ ടീമിനായില്ല. 63ആം മിനുട്ടിൽ ടാമി അബ്രഹാമിന്റെ ഒരു ഷോട്ട് ലെവർകൂസൺ ഗോൾ കീപ്പർ ഹാർദെക്കി തടഞ്ഞു എങ്കിലും റീബൗണ്ടിലൂടെ ബോവെ ലീഡ് നൽകി. ഈ ഗോൾ വിജയ ഗോളായി മാറുകയും ചെയ്തു.
അടുത്ത വ്യാഴാഴ്ച ജർമ്മനിയിൽ വെച്ച് രണ്ടാം പാദ സെമി ഫൈനൽ നടക്കും. കഴിഞ്ഞ സീസണിൽ കോൺഫെറൻസ് ലീഗ് കിരീടം നേടിയ ജോസെ, റോമക്ക് യൂറോപ്പ ലീഗ് കൂടെ നേടിക്കൊടുക്കാം എന്ന പ്രതീക്ഷയിലാണ്.
