കോപ ഡെൽ റേയിലെ രണ്ടാം സെമി ഫൈനലിന്റെ ആദ്യ പാദം സമനിലയിൽ അവസാനിച്ചു. അത്ലറ്റിക്ക് ബിൽബാവോയും ലെവന്റെയും തമ്മിലുള്ള മത്സരം 1-1 എന്ന സ്കോറിലാണ് അവസാനിച്ചത്. അത്ലറ്റിക്കിന്റെ ഹോം ഗ്രൗണ്ടിൽ ആയിരുന്നു മത്സരം നടന്നത്. മത്സരത്തിന്റെ 26ആം മിനുട്ടിൽ മെലേറോ ലെവന്റയ്ക്ക് ലീഡ് നൽകി. ആദ്യ പകുതിയിൽ നിറം മങ്ങിയ അത്ലറ്റിക് രണ്ടാം പകുതിയിൽ കാര്യങ്ങൾ മെച്ചപ്പെടുത്തി.
59ആം മിനുട്ടിൽ ഇനീഗോ മാർട്ടിനെസ് അത്ലറ്റികിന് സമനില നൽകി. ഒരു ബുള്ളറ്റ് ഹെഡറിലൂടെ ആയിരുന്നു ഇനിഗോയുടെ സമനില ഗോൾ. സമനില ആയതു കൊണ്ട് തന്നെ ലെവന്റെയ്ക്ക് ആണ് ഇത് മികച്ച സ്കോർ. അവർക്ക് ഒരു എവേ ഗോളും ലഭിച്ചു. ഇനി മാർച്ച് നാലിനാണ് രണ്ടാം പാദ മത്സരം നടക്കുക.
