ബംഗ്ലാദേശ് ക്ലബ്ബിനെ സമനിലയിൽ തളച്ച് മിനർവ പഞ്ചാബ്

- Advertisement -

എ.എഫ്.സി കപ്പിൽ ബംഗ്ളാദേശ് ക്ലബായ അഭഹനി ധാക്കയെ സമനിലയിൽ കുടുക്കി മിനർവ പഞ്ചാബ്. ഇരു ടീമുകളും രണ്ടു ഗോൾ വീതം അടിച്ച് സമനിലയിൽ പിരിയുകയായിരുന്നു. രണ്ടു തവണ മത്സരത്തിൽ ലീഡ് നേടിയതിന് ശേഷമാണു മിനർവ മത്സരത്തിൽ സമനില വഴങ്ങിയത്. എ.എഫ്.സി കപ്പിൽ മിനർവയുടെ രണ്ടാമത്തെ സമനിലയായിരുന്നു ഇത്. ആദ്യ മത്സരത്തിൽ ചെന്നൈയിനോടാണ് മിനർവ സമനിലയിൽ കുടുങ്ങിയത്

മഹ്മൂദ് അംനയിലൂടെ മത്സരത്തിന്റെ 16ആം മിനുട്ടിൽ മിനർവ പഞ്ചാബാണ് ആദ്യം ഗോൾ നേടിയത്. എന്നാൽ നാല് മിനിറ്റുകൾക്ക് ശേഷം ധാക്ക നബിബ് ജിബോണിലൂടെ മത്സരത്തിൽ സമനില പിടിച്ചു. മുൻ കേരള ബ്ലാസ്റ്റേഴ്‌സ് താരം ബെൽഫോർട്ടിന്റെ പാസിൽ നിന്നായിരുന്നു ഗോൾ പിറന്നത്. തുടർന്ന് ആദ്യ പകുതി അവസാനിക്കുന്നതിന് മുൻപ് മലയാളി താരം ശ്രേയസ് ഗോപാലനിലൂടെ മിനർവ വീണ്ടും മുൻപിലെത്തി. എന്നാൽ രണ്ടാം പകുതിയുടെ തുടക്കത്തിൽ സൺ‌ഡേ ചിസോബയിലൂടെ വീണ്ടും അഭഹനി ധാക്ക സമനില പിടിക്കുകയായിരുന്നു.  സമനില പിടിച്ചതോടെ മത്സരത്തിൽ ആധിപത്യം സ്വന്തമാക്കിയ ധാക്ക പലതവണ മിനർവ ഗോൾ മുഖം ആക്രമിച്ചെങ്കിലും ഭാഗ്യം കൊണ്ടാണ് പലപ്പോഴും മിനർവ രക്ഷപെട്ടത്.

Advertisement